Atyraýda túrli salanyń úzdikteri marapattaldy

ATYRAÝ. QazAqparat - Atyraýda Qurmanǵazy atyndaǵy Mádenıet saraıynda munaıly óńirdiń damýyna úles qosqan túrli salanyń úzdik ókilderin dástúrli marapattaý saltanaty ótti, dep habarlaıdy QazAqparat tilshisi.

Sharada aımaqtyń tynys-tirshiligine jyl on eki aı atsalysqan úzdikter 17 atalym boıynsha irikteldi. Ol: «jyldyń memlekettik qyzmetkeri», «mádenıet qyzmetkeri», «jyl muǵalimi», «jyl sportshysy», «jyldyń quqyq qorǵaýshysy», «jyl dárigeri», «jyl qurylysshysy», «áleýmettik salanyń jyl qyzmetkeri», «jyl kásipkeri», «jyl jýrnalısti», «aýyl sharýashylyǵy salasynyń qyzmetkeri», «kommýnaldyq salanyń jyl qyzmetkeri», «jyl depýtaty», «belsendi depýtat», «jyldyń úzdik depýtaty», «erligi úshin».

Úzdikter arasynan QR Jýrnalıster odaǵynyń múshesi, respýblıkalyq «Aıqyn» gazetiniń Atyraý oblysyndaǵy menshikti tilshisi Tursyn Kalımova «jyl adamy -2019» atandy. Ol – oblys ákiminiń T. Amandosov atyndaǵy arnaıy dıplomy men «QazMunaıGaz» ulttyq kompanııasy ótkizgen «Qalam qýaty» konkýrsynyń Gran-prı ıegeri. 2017 jyldyń «Jyl jýrnalısi» nomınatsııasynyń jeńimpazy. Qalamy qarymdy jýrnalıst Tursyn Qalımova Halyq qaharmany Hıýaz Dospanova esimin Atyraý halyqaralyq áýejaıyna berý týraly bastamashyl toptyń jetekshisi jáne «Hıýaz» kitabyn qurastyrýshy. Búginde Tursyn Jumabekqyzynyń Halyq qaharmany H.Dospanovanyń sáýletti eskertkishin turǵyzý týraly bastamasy oń sheshimin tapty. Sondaı-aq, memleket basshysynyń jáne oblys ákimi, halyqtyń qoldaýymen Atyraý halyqaralyq áýejaıyna H.Dospanova esimi berildi. Sonymen qatar, Tursyn Jumabekqyzy halyqty alapat ashtyqtan aman alyp qalǵan qumarshyq ósimdigine qoıylǵan «Qumarshyq dáni» kompozıtsııalyq eskertkishtiń avtory.