Atyraýda týrıstik logotıp jasaýǵa bólingen 3,7 mln teńge bıýdjetke qaıtarylady
Óńirlik kommýnıkatsııalar qyzmetiniń aqparatyna qaraǵanda, QR Úkimetiniń týrıstik salany damytýdyń 2019-2025 jyldarǵa arnalǵan memlekettik baǵdarlamasy sheńberinde «Oblystyń týrıstik logotıpin jasaý» qyzmeti qarastyrylǵan. Ondaǵy maqsat — óńirdiń brendin jáne uranyn daıyndaýdyń maqsaty, óńirde ishki týrızmdi damytý, óńirdiń ınformatsııalyq alǵa jyljyýyna járdemdesý.
«Bıylǵy 15 maýsymda «Atyraý oblysynyń týrıstik logotıpin jasaý» jónindegi memlekettik satyp alý boıynsha ashyq konkýrs jarııalandy. Konkýrstyń birinshi kezeńinde qatysýshy bolmaǵan. «Memlekettik satyp alý» zańyna sáıkes 14 shildede ekinshi ret ashyq konkýrs tásilimen qaıtadan jarııalandy. Bul konkýrs boıynsha óńirdiń logotıpi elektrondy túrde jasaqtalýy tıis edi. Onlaın rejıminde júrgizilgen suranystan soń, logotıp tańdalyp, saraptyq komıssııa qaraýyna usynylady dep josparlanǵan bolatyn», - dep habarlady óńirlik kommýnıkatsııalar qyzmeti.
Alaıda, oblystyq kásipkerlik jáne ındýstrııalyq-ınnovatsııalyq damý basqarmasy epıdemıologııalyq ahýalǵa baılanysty memlekettik satyp alý boıynsha josparlanǵan týrıstik logotıpti jasaqtaýdy qysqartty. Oǵan bólingen 3,7 mln teńgeni bıýdjetke qaıtarý týraly sheshim qabyldanyp otyr.
Eske sala ketelik, Atyraý oblysynda karantın rejımi kúsheıtilgen edi.