Atyraýda topyraq úıindisiniń astynda qalǵan eki adam qaıtys boldy

ATYRAÝ. QazAqparat – Atyraýda topyraq astynda qalǵan eki er adam qaıtys boldy. Olar jeke turǵyn úıdiń janynan qazylǵan shuńqyrǵa qulaǵan topyraqtyń astynda qalǵan, dep habarlaıdy QazAqparat tilshisi.

Bul derekti oblystyq polıtsııa departamentiniń baspasóz qyzmeti rastady. Eki adamnyń ólimine soqtyrǵan qaıǵyly oqıǵa keshe bolǵan.

«18 maýsymda eki er adam Atyraý qalasyndaǵy «Juldyz» shaǵyn aýdanynda ornalasqan jeke turǵyn úıdiń janynan shuńqyr qazǵan. Sol kezde sý qubyry jarylyp ketken. Sonyń saldarynan qazylǵan shuńqyrǵa topyraq úıindisi qulaǵan. Eki er adam topyraq úıindisiniń astynda qalyp, shyǵa almaǵan. Ekeýi de oqıǵa ornynda qaıtys boldy», - dep málim etti departamenttiń baspasóz qyzmetinen.

Qaıtys bolǵandardyń biri – 1989 jylǵy, ekinshisi – 1999 jyly týǵan.

Qazir polıtsııa qyzmetkerleri osy derekke baılanysty tergeý amalyn júrgizip jatyr.

Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

«Juldyz» – Atyraý qalasyndaǵy jańadan boı kótergen shaǵynaýdan. Munda jeke ıeliktegi turǵyn úıler salynǵan. Buryn dál osy shaǵynaýdannan 1,5 jasar balaqaı úıinen shyǵyp ketip, iz-túzsiz joǵalǵan edi. Keıin ol óz úıiniń aýlasyndaǵy káriz rezervýarynan tabyldy.

Budan bólek, osy shaǵynaýdanda eki jasar balany qabaǵan ıt talap, aýrýhanaǵa túsken edi.