Atyraýda toqyma geosıntetıka óndiretin tseh ashylady

ASTANA. QazAqparat – Jyl basynan Atyraý oblysyna 1,1 trln teńge ınvestıtsııa tartyldy. Bul týraly Atyraý oblysynyń ákimi Serik Shápkenov aıtty, dep habarlaıdy QazAqparat tilshisi.

«Polıpropılen zaýyty iske qosylǵannan keıin sodan ónim shyǵaratyn úsh jobany iske asyrmaqpyz. Olar: toqyma geosıntetıka, ekstrýzııalyq geosıntetıka jáne Toqyma emes geotekstıldi mata», - dedi oblys basshysy búgin Ortalyq kommýnıatsııalar qyzmetindegi baspasóz máslıhatynda.

Ákimdik dereginshe, toqyma geosıntetıka óndiretin tseh quny – 2 mlrd teńge. Onda óndiriletin qurylys materıaldary jol men gıdrotehnıka qurylysynda, qubyrlar men qoımalar salýda jáne taǵy basqa salalarda paıdalanylady. Buryn bul ónimder shetelden satyp alynǵan. Endi olar elimiz boıynsha Atyraýda ǵana shyǵarylady. Osylaısha otandyq ónimmen ishki naryqty qamtyp qana qoımaı, eksporttaýǵa da múmkindik týady.

Al ekstrýzııalyq geosıntetıka óndiretin tseh quny – 3 mlrd teńge. Munda jylyna geotor, geomembrana, kompozıttik geomaterıaldar sekildi bas-aıaǵy 10 mln sharshy metr ónim óndiriledi. Bul materıaldar avto jáne temirjol, ónerkásiptik qaldyqtar qoımalarynyń qurylysynda, sondaı-aq jaǵalardy bekitý jumystarynda paıdalanylady.

Toqyma emes geotekstıldi mata zaýytynyń quny — 1,3 mlrd teńge. Bul óndiris oshaǵynda eksportqa baǵyttalǵan toqyma emes geotekstıldi mata óndirilmek. Ónim avtojoldar qurylysynda qoldanylady.