Atyraýda tóbesinen sý aqqan mekteptiń oqýshylary ózge bilim ordasyna aýystyryldy

ATYRAÝ. QazAqparat – Atyraý qalasyndaǵy №30 mektep-gımnazııanyń tóbesinen sý áli aǵyp tur. Sol sebepten, oqýshylar ózge mektepterge aýystyrylyp jatyr, dep habarlaıdy QazAqparat.

Mektep-gımnazııa dırektorynyń mindetin atqarýshy Aıgúl Janazarovanyń málimetine súıensek, bilim mekemesinde 2075 oqýshy qazaq jáne orys tilderinde bilim alady.

«Tóbeden sý aqqanyna baılanysty oqýshylar onlaın formatta oqýǵa jiberildi. Endi qazaq jáne orys tilderinde bilim alatyn 1-4 synyptardyń oqýshylaryn №20 mektep-lıtseıge aýystyrýǵa sheshim qabyldandy. Al 5-11 orys synyptarynyń oqýshylary №8 orta mektepte oqıtyn boldy. 5-11 qazaq synyptarynyń oqýshylaryn basqa bilim ordasynda oqýǵa aýystyrý máselesi áli qaralyp jatyr», - dep málim etti Aıgúl Janazarova.

1200 oqýshyǵa eseptelgen atalǵan mektep-gımnazııanyń ǵımaraty 2002 jyly paıdalanýǵa berilgen. Bilim ordasynda 150 muǵalim men 33 tehnıkalyq qyzmetker jumys isteıdi.

Eske salaıyq, budan buryn Atyraýda tóbesinen sý aqqan mekteptiń oqýshylary basqa bilim ordasyna aýystyrylatynyn jazǵan bolatynbyz.

Oblystyq bilim basqarmasy baspasóz qyzmetiniń deregine qaraǵanda, bıyl bul mektep-gımnazııa ǵımaratyna kúrdeli jóndeý júrgizý josparlanyp otyr. Qazir jobalyq-smetalyq qujattary daıyn.

Nysanǵa memlekettik saraptama júrgiziledi. Bul maqsatqa 1 mln 650 myń teńge qarastyrylǵan. Saraptama qorytyndysy daıyn bolǵan soń kúrdeli jóndeý jumystaryna qarjy bólinedi.