Atyraýda tóbesinen sý aqqan mekteptiń oqýshylary basqa bilim ordasyna aýystyrylady

ATYRAÝ. QazAqparat – Atyraýda tóbesinen sý aqqan mekteptiń oqýshylary sabaqty onlaın formatta oqyp júr. Endi oqýshylardy basqa bilim ordasyna aýystyrý máselesi qaralyp jatyr, dep habarlaıdy QazAqparat.

Oblystyq bilim basqarmasynyń baspasóz qyzmeti bul derekti rastap otyr.

Atyraý qalasyndaǵy №30 mektep-gımnazııasynyń oqýshylary keshe, 16 aqpanda onlaın formatta oqýǵa jiberilgen.

Mektep-gımnazııa dırektory Aıgúl Janazarovanyń aıtýynsha, onlaın formattaǵy oqý 18 aqpanǵa deıin sozylady. Buǵan bilim ordasy ǵımaratynyń tóbesinen sý aqqany sebep bolǵan. Sonyń saldarynan oqý kabınetteriniń japsyrmalary búlingen.

«Aqpan aıynyń basynda kóp mólsherde qar jaýdy. Keıin №30 mektep-gımnazııasynyń tóbesinen erigen qar sýy aǵyp, tóbe jabyndylary jaramsyz kúıge tústi. Osyǵan baılanysty oqýshylar qashyqtan oqýǵa jiberildi. Bıyl bul mektepte kúrdeli jóndeý jumystary júrgiziledi. Qazir jobalyq-smetalyq qujattary daıyn. Bilim ordasynyń ǵımaratyna memlekettik saraptama júrgizýge tıisti qarajat qaraldy. Saraptama qorytyndysy jasalǵan soń mekteptiń kúrdeli jóndeý jumystaryna qarjy bólinedi», - dep habarlady basqarmanyń baspasóz qyzmeti.

Belgili bolǵandaı, oqýshylar bilim ordasyna ázirge qaıta oralmaıdy. Óıtkeni, qazir №30 mektep-gımnazııasynyń oqýshylaryn basqa mektepte oqýǵa kóshirý máselesi qaralyp jatyr.

Eske sala ketelik, buǵan deıin Atyraýda mekteptiń elektr jelisinen aqaý shyǵyp, oqýshylar qashyqtan oqýǵa jiberilgenin habarlaǵan bolatynbyz.

Keıin eki kún mektep pen kolledjdegi sabaq onlaın formatta ótetinin jazǵan edik.