Atyraýda tize jaraqatynan júre almaı qalǵan 9 jasar qyzdyń tusaýy kesildi

ATYRAÝ. QazAqparat – Atyraý oblystyq balalar aýrýhanasyndaǵy «Qamqorlyq» ońaltý ortalyǵynda 9 jasar qyzdyń tusaýy kesildi. Jyl basynda onyń sol jaq tizesi jaraqattanyp, júre almaı qalǵan, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń málimetinshe, bıylǵy 31 qańtarda Jylyoı aýdanynda turatyn Almıra esimdi 9 jasar qyz mektepten kele jatyp buralqy ıtten qashqan. Sol kezde jol jıegine qulap, sol jaq tizesin bordıýrge soǵyp alǵan.

«Aldymen, Jylyoı aýdandyq ortalyq aýrýhanasyna qaralǵan. Keıin oǵan 2 aqpanda oblystyq balalar aýrýhanasynda jambas súıegine eki ota jasaldy. Al, 8 shilde kúni jambas súıeginen ımplanttalǵan fıksatorlardy alyp tastaý otasy sátti ótti. Budan soń ambýlatorlyq baqylaýǵa alynyp, reabılıtatsııalyq ortalyqta emdeldi. Sol kúni oblystyq balalar aýrýhanasynyń bazasynda ornalasqan «Qamqorlyq» ońaltý ortalyǵyna jatqyzyldy», - dep habarlady basqarmanyń baspasóz qyzmetinen.

Atalǵan ortalyqta ońaltýdan sátti ótken Almıra qaıtadan qalypty júrýge múmkindik alǵan. Osyǵan oraı, oblystyq balalar aýrýhanasynyń jas mamany, travmatolog Jaqsylyq Maǵzomov 9 jasar qyzdyń tusaýyn kesti. Almıra otbasyna oraldy.

Eske sala ketelik, budan buryn Atyraýda 1 jasar balanyń mıyna kúrdeli ota sátti jasalǵanyn jazǵan bolatynbyz.