Atyraýda terrorızmniń aldyn alýǵa baǵyttalǵan aýqymdy jumystar bastaldy
Bes baǵytqa bólingen jumys jospary boıynsha tańerteń Jylyoı aýdandyq «Keń Jylyoı» mádenıet úıinde Atyraý oblysy ákiminiń orynbasary Álibek Náýtıevtiń qatysýymen aktıv jınalysy ótip, Jylyoı aýdanyndaǵy úsh kúndik jumys jospary bekitildi.
Jylyoı aýdanynyń ákimi Maqsym Іzbasovtyń aıtýynsha, atalmysh is-sharanyń aýdanda ótýiniń mańyzdylyǵy joǵary. Búginde Jylyoı aýdany boıynsha jumysshy toptar zerdeleıtin nysandar anyqtalǵan. Atyraý oblysynyń prokýrory Ǵalymjan Toǵyzbaev ótken jyly terorızmniń aldyn alýǵa baǵyttalǵan 7 baǵyttan turatyn is-shara elimizde, Aqtóbe oblysynda uıymdastyrylyp, óz nátıjesin bergendigin atady.
«Jumysshy top úsh kún boıy Jylyoı aýdanyndaǵy josparlanǵan mekemelerge, aýyldyq eldi-mekenderge baryp, qyzmetkerlermen, halyqpen kezdesý ótkizedi. Halyqtyń qandaı túıtkildi máseleleri bar, sony anyqtaımyz. Sonyń ishinde aýyldyq eldi-mekenderde turatyn zeınetkerler, múgedekterdiń saýaldary men máseleleri bolsa sheshemiz. Toptyń quramynda ardagerler, quqyq qorǵaý organynyń qyzmetkerleri, densaýlyq saqtaý salasynyń qyzmetkerleri sekildi ártúrli salanyń mamandary men turǵyndardyń ózderi saılaǵan depýtattar bar», - dedi prokýror.
Atyraý oblysy ákiminiń orynbasary Álibek Náýtıevtiń málimdegenindeı, arnaıy top turǵyndarǵa densaýlyq saqtaý, jumyspen qamtý, terrorızmniń aldyn alý baǵyttary boıynsha túsinik berdi. Memleket basshysynyń júrgizip otyrǵan saıasaty, «Nátıjeli jumyspen qamtý» sekildi baǵdarlamalary jóninde de turǵyndar tolyq málimet ala alady.
«Ədette, búlik túsinbestikten bastalatyny belgili. Eger qandaı da bolmasyn ujymda jumysshylar arasynda túıtkildi máseleler bolsa, túrli sala mamandarynan qurylǵan jumysshy top ókilderin mekemelerine shaqyrýyna bolady. Jospardan tys ta halyqpen kezdesip, túsinik jumysyn júrgizýge, keńes berýge jumysshy top daıyn», dedi Ǵ.Toǵyzbaev.