Atyraýda sýǵa batyp bara jatqan dosyn qutqarǵan 8 jasar bala marapattaldy

ATYRAÝ. QazAqparat – Atyraýda ózinen úlken jasóspirimdi qutqarǵan 8 jasar bala marapttaldy, dep habarlaıdy QazAqparat tilshisi.

Buǵan deıin Atyraýda 8 jasar bala Jaıyq ózenine batqan jasóspirimderdi qutqarýǵa kómekteskenin jazǵan edik.

Dinmuhammed Jańbyrbaı eki jasóspirimniń birin qolynan tartyp, sýdan shyǵýyna kómek bergen. Ol Atyraý qalasyndaǵy №3 mekteptiń 3-synybynda oqıdy.

Búgin, 5 jeltoqsanda jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaev mektepke baryp, 8 jasar qutqarýshyǵa oblystyq departamenti bastyǵynyń alǵys hatyn tapsyrdy.

«Ár azamat óz eliniń patrıoty bolýy kerek. Dinmuhammedtiń batyldyǵy eki jasóspirimniń aman qalýyna septigin tıgizdi. Osyndaı batyl balanyń ósip kele jatqany qýantady. Ózińdeı ul ósirip otyrǵan ata-anańa raqmet. Ádaıym qatarlastaryńa úlgi bolyp júr. Áleýmettik jeliden seniń batyldyǵyńdy elimizdiń, tipti kórshiles memleketterdiń turǵyndary kórip, rızashylyǵyn bildirip jatyr. «Qazaqstanda, onyń ishinde Atyraýda osyndaı batyr bala bar» degen sózdiń ózi bárimizdi marqaıtyp otyr» -dedi Erlan Bıǵambaev.

Dinmuhammed Jańbyrbaı – otbasynyń ortanshy perzenti. Onyń otbasynda ápkesi men inisi bar. Ata-anasy ulynyń batyl áreketin beınejazbadan kórgen.

«Ákem sol kúni ózenge barmaý keregin eskertti. Sol sebepten, balalardyń artynan ileskenimmen, muz ústine shyǵýǵa asyqpadym. Biraq, dostarymnyń muzǵa túsip ketkenin kórip, kómektesýge bardym. Qolymdy sozyp, bireýiniń sýdan shyǵýyna kómektestim. Keıin 6 polıtseı keldi. Ákem ózenge barǵanym úshin urysatyn bolar dep oılap edim. Alaıda, ákem urysqan joq. Búgin synyptastarym «Dinmuhammed, jaraısyń!» dep aıtyp jatty», - deıdi Dinmuhammed Jańbyrbaı.