Atyraýda sońǵy 2 jylda brakonerlerden 600-den astam kólik tárkilendi

ATYRAÝ. QazAqparat - Atyraýda sońǵy eki jarym jyl ishinde brakonerlerge qatysty 4000-nan astam quqyqbuzýshylyq anyqtalyp, 58 zańsyz balyq aýlaýshynyń ústinen 35 qylmystyq is qozǵalǵan, dep habarlaıdy QazAqparat tilshisi Atyraý oblysy ákiminiń baspasóz qyzmetine silteme jasap. 

Brakonerlerden jalpy somasy 125 mln teńge shyǵyn óndirildi. QR AShM Atyraý oblystyq orman sharýashylyǵy jáne janýarlar álemi aýmaqtyq ınspektsııasynyń basshysy Danııar Baımaǵambetovtiń aıtýynsha, barlyq quzyrly organdardyń birlesken jumysynyń nátıjesinde brakonerlikpen kúres keń kólemde júrgizilip keledi.

«Sońǵy eki jylda qoldanylǵan sharalar nátıjesinde brakonerlikpen kúres kúsheıdi, mysaly 2014-2015 jyldary 14 qylmystyq is qozǵalsa, 2016-2017 jyldary 35 boldy. Sońǵy eki jylda zańsyz balyq aýlaýshylar 125 mln teńge shyǵyndy ótedi, 2014-2015 jyldary 33 mln teńge bolǵan edi. Eki jylda 11 myń balyq aýlaý quralyn, 600 júzý jáne kólik quraldaryn tárkiledik»,-deıdi Danııar Baımaǵambetov.  

Inspektsııa basshysynyń aıtýynsha, qazir naqty nátıje bar.

«Aıta ketý kerek, kóp jyldan beri bıyl ǵana Jaıyq ózeninde ǵylymı-zertteý jumystary kezinde shoqyr balyǵynyń shabaqtary anyqtaldy, bul balyq qorǵaý jumystarynyń tıimdiligin kórsetedi. Baǵaly balyq túrleri ýyldyryq shashatyn oryndaryna deıin jetti. Osylaısha bıyl bekireler jasandy ǵana emes, tabıǵı túrde de óndiriledi. Memleket basshysy balyq qoryn bolashaq urpaq úshin saqtaý mindetin qoıdy. Qazir zańsyz balyq aýlaýmen kúsheıtilgen kúres nátıjesinde bolashaqqa úmit paıda boldy»,-deıdi D. Baımaǵambetov. 

Kúzgi maýsymda balyq aýlaý kooperatıvterine beriletin lımıttiń ıgerilýine erekshe kóńil bólinip otyr. Balyq qabyldaý bólimsheleri qatań qadaǵalanady. Osy sharalar balyq sharýashylyǵy sýbektileriniń kvotany ıgerý mólsherin 87,3 paıyzǵa deıin arttyrýǵa yqpal etti. Bul - sońǵy 8 jyldaǵy eń joǵary kórsetkish.

«Ókinishke qaraı, keı kooperatıvter barlyq aýlaǵan balyqtaryn tirkemeıtin bolyp shyqty. Ol balyq aýlaýǵa berilgen lımıttiń tolyq ıgerilmeýine ákelip, kóleńkeli naryqty yntalandyrady. Qazir árbir resmı balyq aýlaý qaıyǵy men ony qabyldaý bólimshelerin baqylaýda ustap otyrmyz. Tabıǵat paıdalanýshylardyń zańmen belgilengen tártipte tek ruqsat etilgen balyq túrlerin ǵana aýlaýyn da qadaǵalaımyz», - deıdi Atyraý oblystyq orman sharýashylyǵy jáne janýarlar álemi aýmaqtyq ınspektsııasynyń basshysy Danııar Baımaǵambetov.