Atyraýda sońǵy 2 jylda 18 myń danadan astam psıhotropty dári tárkilengen
Atyraýlyq qoǵam belsendileri áleýmettik jelide psıhotropty dárilerdi satýǵa baılanysty alańdaýshylyq bildirip jatyr. Olar osyǵan baılanysty jaýapkershilikti kúsheıtý jóninde usynys bildirip otyr.
«Esirtki qylmysyna qarsy is-qımyl basqarmasy men patrýldik polıtsııa batalonynyń qyzmetkerleri, ýchaskelik polıtsııa ınspektorlary 2021 jyldan beri zańsyz aınalymnan 18 myńnan astam psıhotropty dári-dármekterdi tárkiledi. Máselen, sol jyly 9 adam ustalyp, olardan 5 135 dana tramadol, trapıkomed dári-dármekteri alyndy. Al, byltyr ustalǵan 17 adamnan 7 800 dana tramadol, trapıkomıd, lırıka dárileri tárkiledi. Bıylǵy jyl basynan beri osyndaı quqyq buzýshylyq úshin 9 ustalyp olardan 3596 dana taramadol, tropıkamed, somnol, alıs dári-dármekteri tárkilendi. Atalǵan derekterge qatysty QR Ákimshilik quqyq buzýshylyq týraly kodeksiniń 426-babyna sáıkes (Farmatsevtıkalyq qyzmettiń jáne dárilik zattar men medıtsınalyq buıymdardyń aınalysy salasynyń qaǵıdalaryn buzý) hattamalar toltyryldy», - dep habarlady departamenttiń baspasóz qyzmeti.
Psıhotropty dárilerdiń zańsyz aınalymymen aınalysý deregimen 6 márte ustalǵan adam bar. Qazir kúdikti 1974 jylǵy áıelge qatysty QR Qylmystyq kodeksiniń 296-babynyń 4-bóligine sáıkes sotqa deıingi tergeý amaldary bastaldy.
«Búgin, 23 naýryzda áleýmettik jelide psıhotropty dári satyp alýǵa baılanysty vıdeo júkteldi. Saraptama qorytyndysymen vıdeodaǵy kóliktiń rýlinde bolǵan 1998 jylǵy júrgizýshiniń esirtkilik-ýytqumarlyq mas kúıde ekeni belgili boldy. Kólik júrgizýshisine QR Ákimshilik quqyq buzýshylyq týraly kodekstiń 608-babyna sáıkes hattama toltyrylyp, ákimshilik qamaýǵa alyndy. Atalǵan meken-jaı boıynsha tekserý jumystary júrgizilip jatyr.
Eske sala ketelik, budan buryn Atyraýda Nıgerııa azamaty psıhotropty zattardy saqtaǵany úshin 6 jylǵa sottalǵanyn jazǵan edik.