Atyraýda sıntetıkalyq esirtkini jasyryn orynǵa jetkizýshi ustaldy
Oblystyq polıtsııa departamenti baspasóz qyzmetiniń málimetine súıensek, esirtki jetkizýshiniń jasy – 30-da.
«Esirtki qylmysyna qarsy is-qımyl basqarmasynyń qyzmetkerleri jedel-izdestirý sharasyn júrgizip, Atyraý qalasynyń aýmaǵyndaǵy turǵyn úıdiń birinen sıntetıkalyq esrtkini asa iri mólsherde jasyryn orynǵa tyǵyp júrgen 1993 jylǵy kúdiktini ustady. Kúdikti esirtkini osyndaı ádispen taratady degen kúdikke ilingen. Kúdiktiden 3 paketke salynǵan aq tústi untaq zaty, túrli tústi orama, zergerlik elektrondy tarazylar, untaq salynǵan 2 ydys, aq tústi untaq zaty bar zıp-paketter, bos 50 zıp-paket jáne kúdiktige tıesili jabystyrǵysh pen Telegram messendjerine jasyryn tyǵý týraly jazylǵan hattary bar uıaly telefon tárkilendi. Osy aıǵaq zaty arqyly qylmystyq is tirkeldi. Saraptama qorytyndysymen alynǵan zattardyń salmaǵy 173,9 gr ekeni anyqtaldy», - dep habarlady departamenttiń baspasóz qyzmeti.
Jergilikti polıtseıler kúdiktige qatysty QR Qylmystyq kodeksiniń 297-babynyń 3-bóligimen sotqa deıingi tergep-tekserý isin bastady. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, buǵan deıin Atyraýda destrýktıvti dinı aǵym ókili turatyn úıdiń aýlasynan marıhýana tabylǵanyn jazǵan bolatynbyz.
Polıtsııa qyzmetkerleri destrýktıvti dinı aǵymdy ustanatyn 23 jastaǵy turǵynnyń Atyraý qalasyndaǵy úıiniń aýlasyna tekserý júrgizdi. Tekserý kezinde jalpy salmaǵy 90,2 gramm marıhýana tárkilendi. Destrýktıvti dinı aǵym ókiliniń buryn sottalǵany anyqtaldy.