Atyraýda sıntetıkalyq esirtkini anyqtaıtyn qurylǵy satyp alýǵa qarjy bólinedi
Bul máseleler Atyraý oblysy ákiminiń orynbasary Jasulan Bısembıevtiń tóraǵalyǵymen ótken nashaqorlyqqa jáne esirtki qylmysyna qarsy is-qımylǵa baǵyttalǵan qyzmetti úılestirý jónindegi óńirlik shtab otyrysynda qozǵaldy.
Oblystyq polıtsııa departamentiniń esirtki qylmysyna qarsy is-qımyl basqarmasy bastyǵynyń orynbasary Roman Ermuhanovtiń aıtýynsha, 5 aıda 45 qylmystyq quqyq buzýshylyqty anyqtalǵan. Zańsyz aınalymnan jalpy salmaǵy 5 keli esirtki zaty tárkilengen. Sondaı-aq, ýytqumarlyq zattaryn jarnamalaıtyn 15 saıt anyqtalyp, buǵattaýǵa joldanǵan.
«Esirtkimen kúres is-sharalaryna kedergi bolatyn birqatar problemalyq másele týyndap otyr. Qazir qolda bar zertteý quraldary esirtkiniń barlyq túrlerin aıyra almaıdy. Sondyqtan, zamanaýı jańa qurylǵy alý qajet. Oblys aýmaǵyndaǵy sora shóbin ósirý alqaptaryn anyqtap, joıý úshin tikushaq pen alystan baqylaý júrgizýge dron apparatynyń qajettiligi týyndady. Internet arqyly jasalatyn esirtki saýdasyna den qoıý maqsatynda aqparattyq tehnologııalar salasyndaǵy mamańdar jetispeıdi», -dedi Roman Ermuhanov.
Oblys ákiminiń orynbasary Jasulan Bısembıevtiń pikirinshe, sıntetıkalyq esirtkimen kúreste qoǵamdyq baqylaýdy kúsheıtý qajet. Óıtkeni, óńirdegi esirtki saýdalaýshylardyń birqatary qoǵam belsendileriniń aralasýymen anyqtalǵan.
«Qoǵamdy mazalaıtyn basty máselelerdiń biri – nashaqorlyq jáne esirtki bıznesi. Ókinishke oraı, bizdiń oblysta esirtkiniń sıntetıkalyq jáne ózge de aýyr túrleri bar. Analıtıkalyq málimetterge sáıkes, oblysta esirtkimen baılanysty qylmystyń sany ósip otyr. Esirtki quraldary men psıhotproptyq zattardyń túrleri kóbeıip, onyń sany 350-den asty. Soǵan baılanysty ata-analar balasynyń sıntetıkalyq esirtki paıdalanyp júrgenin qalaı anyqtaýǵa bolady degen saýalǵa tolyq jaýap alýy qajet. Problemalyq ahýaldy ashyq aıtylýy kerek», -dedi Jasulan Bısembıev.
Onyń aıtýynsha, sıntetıkalyq esirtkiniń jańa túrlerin anyqtaıtyn zamanaýı qurylǵyny satyp alý úshin oblystyq bıýdjetten qajetti qarjy qaralady.
Eske sala ketelik, buǵan deıin Atyraýǵa ózge óńirden kelip esirtki satqan eki adam 7 jáne 10 jylǵa sottalǵanyn jazǵan edik.