Atyraýda sheteldikten para suraǵan polıtseı 18 mln teńge aıyppul tóleıtin boldy
Atyraý qalasynyń №2 sotynda oblystyq polıtsııa departamentiniń patrýldik polıtsııa rotasynyń burynǵy qyzmet ınspektory S-ǵa qatysty QR Qylmystyq kodeksiniń 28-babynyń 4-bóligi, 367-babynyń 2-bóligi jáne 190-babynyń 3-bóliginiń 2-tarmaǵymen qozǵalǵan qylmystyq is qaraldy.
«Oblystyq polıtsııa departamentiniń laýazymdy qyzmetkeri S. Ózbekstan Respýblıkasynyń azamattarynyń tólqujattaryn Atyraý qalalyq polıtsııa basqarmasynyń kóshi-qon qyzmet bóliminen alyp berýge ýáde etken. Basshylarǵa beremin degen syltaýmen Ózbekstan azamaty R-dan barlyǵy 600 000 teńge aldap alyp, sheteldikterdi para berýge ıtermelegen. Nátıjesinde jábirlenýshi R-ǵa 600 000 teńge múliktik zııan kelgen. Sottalýshynyń kinási jábirlenýshiniń, kýálardyń aıǵaqtarymen, beınejazbalarmen dálelin tapty», -dep habarlady №2 sottyń baspasóz qyzmeti.
Prokýror sottalýshy S-ny ómir boıyna quqyq qorǵaý organdarynda qyzmetpen aınalysý quqyǵynan jáne arnaıy sheninen, 4 jyl merzimge bas bostandyǵynan aıyrý túrindegi jaza taǵaıyndaýdy surady.
Sottalýshy men qorǵaýshy taǵylǵan aıyppen kelispeı, S-ny aqtaýdy surady.
«Sot S-nyń qylmystyq jaýapkershiligi men jazasyn jeńildetetin mán-jaı retinde onyń buryn sottalmaǵanyn eskerip, qabyldaǵan antty buzýy jazany aýyrlatatyn jaǵdaı dep tapty. S. joǵaryda kórsetilgen qylmystardy jasaǵany úshin kináli dep tanyldy. Sot úkimimen túpkilikti memlekettik qyzmette jáne memlekettik uıymdarda laýazym atqarý quqyǵynan ómir boıyna aıyra otyryp, paranyń 30 eselengen somasy mólsherinde 18 000 000 teńge aıyppul túrindegi jaza taǵaıyndaldy. Sottalýshy aǵa leıtenanty arnaıy sheninen aıyryldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, budan buryn qyzmettegi áreketsizdigi úshin sottalǵan atyraýlyq polıtseıdiń isi qaıta qaralǵanyn jazǵan edik.