Atyraýda shatyry órtengen úıden 25 adam qaýipsiz jerge evakýatsııalandy
Atyraý oblystyq polıtsııa departamentiniń baspasóz qyzmetinen málim etkendeı, 5 mamyr saǵat 19:32-de 101 arnasyna turǵyn úıdiń órtengeni týraly habar túsken.
«Atalǵan shaqyrtý boıynsha polıtsııa maıory Qýanysh Bozaqaev pen polıtsııa kapıtany Erlan Myrzagereev órtengen turǵyn úıge 4 mınýtta jetken. Keıin 9-qabatqa páter ıesimen birge jedel kóterilip, turǵyndardy evakýatsııalaýǵa kirisken. Alaıda, býdaqtaǵan qara tútin kedergi keltirgen. Óıtkeni, shatyrda tutanǵan órt joǵary qabattaǵy páterlerdiń balkonyn da sharpyǵan. Qos polıtseı qaýiptiń aldyn alý páter balkonyndaǵy órtti óshirgen. Sóıtip páterlerden 25 turǵyndy qaýipsiz jerge evakýatsııalady», -dep habarlady departamenttiń baspasóz qyzmeti.
Eske sala ketelik, budan buryn Atyraýda 10 qabatty turǵyn úıdiń shatyry janyp jatqanyn habarlaǵan edik.
Oblystyq tótenshe jaǵdaılar departamentiniń qoǵammen baılanys tobynan málim etkendeı, órt búgin jergilikti ýaqytpen saǵat 19:22-de tutanǵan.
Órt 10 qabatty turǵyn úıdiń shatyryn sharpyǵan. Belgili bolǵandaı, bul – sońǵy jyldary paıdalanýǵa berilgen «Lagýna» turǵyn kesheni.
Jańa turǵyn úı kesheni Atyraý qalasyndaǵy Mahambet Ótemisuly kóshesinde №123 mekenjaıynda ornalasqan.
Keıin Atyraýda 10 qabatty úıdegi órt bir saǵatta sóndirilgen.
Jalyndy sóndirýge Atyraý oblystyq TJD jáne MEÓQQ kúsh-quraldarynan 50 adam men 11 tehnıka jumyldyryldy. Órttiń tutaný sebebi anyqtalyp jatyr.