Atyraýda shamadan tys júk artqan kólik júrgizýshilerine 16 mln teńge aıyppul salyndy
«Jol aktıvteri sapasy ulttyq ortalyǵy» RMK Atyraý oblystyq fılıalynyń bólim bastyǵy Nurlan Jantýrınniń aıtýynsha, aýyr júk kólikteriniń júrýine negizilgen shekteý bar.
«Aýyr júk kólikteriniń qozǵalysyna 1 maýsym men 31 tamyz aralyǵynda ýaqytsha shekteý engizilgen. Soǵan sáıkes, bir ostik júktemesi 8 tonnadan asatyn kólik quraldary saǵat 10:00-den 22:00 aralyǵynda jalpy paıdalanýdaǵy avtomobıl joldarynda júrmeýi tıis», - deıdi Nurlan Jantýrın.
Onyń aıtýynsha, óńirlik fılıal mamandary Atyraý oblystyq kóliktik baqylaý ınspektsııasy jáne ákimshilik polıtsııa basqarmasynyń ókilderimen birge «Joldaý qabyldaý» aktsııasyn ótkizdi. Reıdtik is-shara kezinde «Aqtóbe-Atyraý-RF shekarasy (Astrahan baǵyty)» tasjolynyń Qarabatan eldimekeni tusyndaǵy demalys alańynda 10-nan astam aýyr júk kóliginiń salmaǵy ólshendi.
Atyraý oblystyq kóliktik baqylaý ınspektsııasynyń bólim bastyǵy Ánýar Bısalıevtiń aıtýynsha, tekserý nátıjesinde aýyr júk kólikteriniń júrgizýshilerine QR Ákimshilik kodeksi 571-babynyń 1-bólimimen, 590-bap jáne 572-baptyń 2-bólimimen 5 hattama toltyryldy. Endi kólik ıeleri 100 aılyq eseptik kórsetkish kóleminde aıyppul tóleıdi.
«Jalpy, jyl basynan beri artyq salmaq tıegen aýyr júk kólikteriniń júrgizýshilerine 86 hattama toltyryldy. Soǵan sáıkes, júrgizýshilerge 16 mln 475 myń teńgege jýyq aıyppul salyndy», - deıdi Ánýar Bısalıev.
Eske sala ketelik, budan buryn álemdi jaıaý aralaýǵa shyqqan saıahatshy Atyraý munaıly, baı ólke bolǵanymen, joly byt-shyt ekenine qynjylys bildirgenin jazǵan edik.