Atyraýda shalǵaıdaǵy aýyl turǵyndary ekpe alý úshin poıyzben tegin keledi

ATYRAÝ. QazAqparat – Atyraý qalasyna «Saǵyz – Atyraý» baǵytyndaǵy «Deni saýdyń – jany saý» dep atalatyn áleýmettik poıyzben Qyzylqoǵa, Maqat aýdandarynyń 45 turǵyny vaktsına alý úshin tegin keldi, dep habarlaıdy QazAqparat.

Qyzylqoǵa aýdanyna jumys saparymen barǵan oblys ákimi Mahambet Dosmuhambetov Saǵyz stansasynan jolǵa shyqqan áleýmettik poıyzdyń vagondaryn kórip, jolaýshylarǵa sáttilik tiledi.

«Bul – shalǵaı aýdandaǵy aýyldardyń turǵyndary úshin uıymdastyrylǵan áleýmettik poıyz. Maqsat – turǵyndardyń oblys ortalyǵyna baryp, vaktsına alýyna qolaıly jaǵdaı jasaý», -deıdi Mahambet Dosmuhambetov.

Qyzylqoǵa aýdanynyń qurmetti azamaty Baıǵalı Dosymbaevtyń aıtýynsha, arnaıy poıyz shyǵaryp,vaktsına alýǵa múmkindik jasaý – turǵyndardyń qaýipsizdigi úshin qajet qadam.

«Buǵan deıin qan qysymym kóterilip, vaktsınany eki ret saldyra almadym. Keıin bala-shaǵamyzdyń densaýlyǵy úshin otbasymyzben vaktsına aldyq. Balalarymyzǵa vaktsına saldyrý qajettigin únemi aıtyp otyramyz. Onyń ústine qazir áleýmettik jeliler arqyly vaktsına týraly teris túsinik qalyptastyryp, halyqtyń ekiudaı oıǵa qaldyryp otyrǵandar bar. Áleýmettik jelidegi mundaı jalǵan aqparat taratýshylarǵa shekteý bolýy kerek», -deıdi Baıǵalı Dosymbaev.

Oblys ortalyǵyna kelgen turǵyndardyń keıbiri vaktsınany alǵash ret saldyrsa, endi biri ІІ komponentin ektirdi. Sonyń biri – Erik Jubanov. Qyzylqoǵa aýdanynyń Janterek

temirjol beketinde elektrshi bolyp jumys isteıdi. Bıyl jasy 60-qa tolǵan.

«Kópten beri vaktsına saldyrýdyń qamyn oılastyryp júr edim. Biraq, jumystan qolym bosamady. Endi mine, Atyraýǵa tegin poıyzben barýǵa bolatynyn estip, jolǵa shyqtym.

Otbasymnyń ózge músheleri «Spýtnık V» vaktsınasyn saldyrdy. Men de osy vaktsınany saldyrýǵa sheshim qabyldadym. Saqtanǵan adam ǵana saý júretinin umytpaǵanymyz jón», - -deıdi Erik Jubanov.

Oblystyq densaýlyq saqtaý basqarmasynyń basshysy Ashan Baıdýálıevtyń málimetinshe, áleýmettik poıyzda 60 oryndyq eki vagon bar. Endi bul poıyzben Qurmanǵazy aýdanyndaǵy shalǵaı aýyldardyń turǵyndaryn oblys ortalyǵyna jetkizý kózdelip otyr.

«Qazir oblysta 59 egý beketi jumys isteıdi. Onyń ishinde 10 jyljymaly beket bar.

Arnaıy áleýmettik poıyzben kelgen turǵyndar úshin Atyraý qalasyndaǵy temirjol aýrýhanasy men №7 Atyraý qalalyq emhanasynda eki egý beketi qyzmet kórsetedi»,- dep atap ótti Ashan Baıdýálıev.

Eske sala ketelik, budan buryn Atyraýda bir aptada Vero Cell vaktsınasyn 1,7 myń adam

saldyrǵanyn habarlaǵan bolatynbyz.