Atyraýda seriktestik dırektory jalǵan bankrottyq deregimen sottaldy

ATYRAÝ. QazAqparat – Atyraýda seriktestik dırektory ádeıi bankrottyq jarııalaǵany úshin sottaldy. Ol ózi basqaratyn uıymnyń 49 mln teńge salyǵyn tólemegen, dep habarlaıdy QazAqparat tilshisi.

Atyraý oblysy boıynsha ekonomıkalyq tergep-tekserý departamenti «Dınıslam» JShS-niń burynǵy basshysyna qatysty jalǵan bankrottyq deregi boıynsha qylmystyq isti tergedi. Qylmystyq is aıyptaý aktisimen sotqa joldandy.

«Seriktestik dırektory 2018-2021 jyldar aralyǵynda kásiporyndy tólem qabiletsizdigine deıin jetkizgen. Osy maqsatta kásiporynnyń balansyndaǵy avtokólik quralyn, múliktik massa bolyp tabylatyn esep shottaǵy qarajattardy ıelikten shyǵarǵan. Sóıtip, 49 mln teńge salyq tólemi túrindegi kredıtorlyq bereshegin tólemesten, seriktestikti ádeıi bankrottyqqa ushyratqan», - dep habarlady departamenttiń shtab basshysy Bekbolat Ánesov.

Sot úkimimen seriktestik dırektory QR Qylmystyq kodeksi 238-babynyń 1-bóliginde kózdelgen qylmystyq quqyq buzýshylyqty jasaǵany úshin kináli dep tanyldy. Oǵan osy bappen kásiptik mekemelerde basshy qyzmetimen aınalysý quqyǵynan 1 jylǵa aıyrý, bas bostandyǵyn 1 jyl merzimge shekteý jazasy taǵaıyndalǵan.

«Bıylǵy jyldyń 6 aıda 25 qylmystyq quqyq buzýshylyq tirkeldi. Departament qyzmetkerleri 43 qylmystyq isti tergep, 20 isti sotqa joldady. Qylmystyq ister boıynsha keltirilgen zalal mólsheri – 1,3 mlrd teńge. Bıýdjetke 495,3 mln teńge qaıtaryldy. 206,6 mln teńgeniń múlkine toqtam salyndy. Jalpy, qaıtarylǵan soma mólsheri – 701,9 mln teńge», - deıdi departamenttiń shtab basshysy Bekbolat Ánesov.

Eske sala ketelik, budan buryn Atyraý oblysynda dızel otynyn zańsyz satqan JShS basshysy sottalǵany habarlanǵan edi.