Atyraýda «Sergektiń» 2748 kamerasy ornatylady

ATYRAÝ. QazAqparat –Atyraýda «Sergek» kameralaryn ornatý, arnaıy júıege qosý júrgizilip jatyr, dep habarlaıdy QazAqparat.

«Kórkem Telekom» kompanııasy baspasóz qyzmetiniń málimetine súıensek, «Sergek» jobasy aıasynda Atyraý qalasynda 2748 kamera ornatý kózdelgen. Onyń 774-i qoǵamdyq qaýipsizdikti baqylaýǵa arnalǵan. Buǵan deıin ornatylǵan 750 beınebaqylaý kamerasy da júıege qosylady.

Al, jol qıylystary men jelilik ýchaskelerdi 612 kamera baqylaıdy. Sonymen birge, joba aıasynda polıtseılerge arnalǵan 100 planshet pen 10 ekometeodatchık qarastyrylǵan.

«Joba kezeń-kezeńmen iske qosylady. Naýryz aıynda bastalyp, birneshe aıǵa jalǵasady. Jol qozǵalysy erejelerin buzǵandardy tirkeý jáne aıyppul salý júıesin iske qosý týraly ókiletti organdar qosymsha aqparat beredi» - dep habarlady kompanııanyń baspasóz qyzmeti.