Atyraýda «San-Remo Saraishyq» atty ıtalıandyq mýzyka festıvali ótti
Atyraý qalasy ákimi baspasóz qyzmetiniń xabarlaýynsha, keshe Sultan Beıbarys atyndaǵy alańda Atyraý mýzykasynyń tarıhynda tuńǵysh ret «San-Remo Saraishyq» festıvali ótti. Kontsertti uıymdastyrýshy - qalalyq mádenıet jáne tilderdi damytý bólimi. Atyraý qalasynyń turǵyndary men qonaqtaryn ásem ánmen qýantý úshin Italııanyń «San Remo» halyqaralyq festıvalinen 8 ártis keldi. Olardyń arasynda álemge áıgili ártister - tanymal tenor Rodolfo Marııa Gordonı, «San-Remo» festıvaliniń turaqty qatysýshysy jáne kompozıtor Isabeo Bıffı, sondaı-aq tanymal halyqaralyq Alt @Moda toby bar.
«Atyraýǵa men alǵash ret keldim. Qala turǵyndary meni jáne meniń áriptesterimdi qonaqjaı kóńilmen, zor iltıpatpen qarsy aldy. Biz tanymal - Toto Cutunje, Adriano Celintano, Richie jáne Poveri, Pupo, Nada jáne basqa da ıtalıandyq ártisterdiń ánderinen turatyn úlken repertýardy alyp keldik. Kórermender óte jyly qarsy alyp, bizben birge án shyrqady. Óte jaqsy kóńil-kúı syılady», - deıdi ánshi Isabeo Bıffı.
Uıymdastyrýshylardyń aıtýynsha, «Sıýzanna», «Felıchıta» jáne keńestik dáýirdiń basqa da tanymal ánderi Atyraý qalasynyń turǵyndary úshin, ásirese, qart adamdar úshin shynaıy mereke boldy.
«Osyndaı dárejede ótken festıval qalamyzdyń tarıhynda alǵash ret bolyp otyr. Búgin shamamen eki myń kórermen áıgili ıtalıandyq ártisterdiń ónerin tamashalady. Eki eldiń mádenıeti men tilin baılanystyrý - bizdiń basty maqsatymyz bolatyn. Osy maqsat júzege asty dep esepteımin. Endigi kezekte Italııa elinde Qazaqstan estradasynyń kontsertin qoıyp, ıtalıandyqtardy bizdiń mádenıetimiz jáne tilimizben tanystyrsaq, jaqsy bolar edi», - deıdi Atyraý qalasy mádenıet bóliminiń bas mamany Qarlyǵash Qumarova.
Aıta ketsek, «San-Remo» - tanymal ıtalıandyq án baıqaýy. Ár jyl saıyn aqpan aıynyń ortasynda Italııanyń soltústik-batysyndaǵy San-Remo qalasynda ótkiziledi. Baıqaýda buryn sońdy kópshilik arasynda oryndalmaǵan ıtalııalyq kompozıtorlardyń ánderi shyrqalady.