Atyraýda samokatpen kólikke soqtyǵysqan 2 jasóspirimniń biri jansaqtaý bólimine tústi
Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy Atyraý qalasynda bolǵan.
«Jergilikti ýaqytpen keshki saǵat 21:15 shamasynda Ábilhaıyr han dańǵylymen samokatpen kele jatqan 2013 jáne 2017 jylǵy jasóspirimder Hyundai Accent markaly kóligimen soqtyǵysqan. Jol-kólik oqıǵasynan 6 jasar jasóspirim zardap shekti. Dene jaraqatyn alǵan jasóspirim jedel járdem brıgadasynyń kóligimen oblystyq balalar aýrýhanasyna jetkizilip, jansaqtaý bólimine jatqyzyldy», - dep habarlady departamenttiń baspasóz qyzmeti.
Polıtsııa qyzmetkerleri jol-kólik oqıǵasyna baılanysty tıisti is-qujattaryn jınaqtap, Atyraý qalalyq polıtsııa basqarmasynyń anyqtaý bólimine tapsyrdy.
Eske sala ketelik, budan buryn Atyraý oblysyndaǵy respýblıkalyq joldarda kólik apatynan 33 adam kóz jumǵanyn habarlaǵan bolatynbyz.
Patrýldik polıtsııa rotasynyń komandıri, polıtsııa kapıtany Ádilbek Shahmetovtiń deregine súıensek, Atyraý oblysyndaǵy respýblıkalyq tas joldarda 38 jol-kólik oqıǵasy tirkelgen. Kólik apatynyń saldarynan 33 adam mert boldy. Al 57 adam ártúrli dene jaraqatyn alǵan.
Keıin Atyraý oblysynda KamAZ-ben soqtyǵysqan jeńil kóliktiń 3 jolaýshysy mert bolǵanyn jazǵan edik.
Atyraý-Inder tas jolynyń 123-shaqyrymy tusynda Toyota Camry men KamAZ júk kóligi soqtyǵysqan. Jol-kólik apatynan Toyota Camry kóliginiń 3 jolaýshysy oqıǵa ornynda mert boldy. Al jeńil kóliktiń júrgizýshisi aýrýhanaǵa jetkizildi. Qaıtys bolǵandar anasy men 1 jáne 15 jastaǵy qyzdary ekeni anyqtaldy. Olar – Batys Qazaqstan oblysynyń turǵyndary.