Atyraýda ruqsatsyz aýaǵa gaz jaqqan sheteldik kompanııa 21 mln teńge aıyppul tóledi
Atyraý oblystyq ekologııa departamentiniń baspasóz qyzmetinen málim etkendeı, «China National Chemical Engineering Co. LTD» (CNCEC) kompanııasynyń Atyraý oblysyndaǵy fılıalyna tekseris júrgizilgen.
«Atyraý oblysy boıynsha ekologııa departamentine Atyraý oblysynyń tabıǵı resýrstar jáne tabıǵat paıdalanýdy retteý basqarmasynan «China National Chemical Engineering Co. LTD» Qazaqstan Respýblıkasyndaǵy fılıalyna zańdy sharalar qoldana otyryp, gazdy ruqsatsyz jaǵý faktisi boıynsha tekserý júrgizýdi suraǵan hat tústi. Osyǵan oraı departament qyzmetkerleri CNCEC kompanııasynyń fılıalyna Qazaqstan Respýblıkasynyń ekologııalyq zańnamasynyń saqtalýyna qatysty jospardan tys tekserý júrgizdi. Tekserý barysynda 2015 jylǵy 31 jeltoqsanda bas merdiger CNCEC pen «Kazakhstan Petrochemical Industries Inc» JShS arasynda jobalaý, jetkizý jáne qurylys júrgizý sharty jasalǵany, soǵan sáıkes qurylysty bas merdiger mekeme júrgizgeni anyqtaldy. Qurylysqa arnalǵan jer ýchaskesi 2018 jylǵy naýryzda qabyldaý-tapsyrý aktisine sáıkes bas merdigerge berilgen. Sonymen qatar, CNCEC-te gazdy jaǵý kezindegi emıssııalardy júzege asyrýǵa ekologııalyq ruqsat bolmaǵan», -dep habarlady departamenttiń baspasóz qyzmeti.
Osylaısha, tekserý kezinde CNCEC kompanııasy fılıly 2022 jyly gazdy jaǵýdy qorshaǵan ortaǵa emıssııalardy ekologııalyq ruqsatsyz júzege asyrǵany anyqtaldy.
Osyǵan baılanysty CNCEC-ke qatysty QR Ákimshilik quqyq buzýshylyq týraly kodeksiniń 328-babynyń 1-bóligi boıynsha hattama jáne ákimshilik jaza qoldaný týraly qaýly shyǵarylǵan.
Qaýlyǵa sáıkes kompanııaǵa 21 mln 267 myń 327 teńge mólsherinde ákimshilik aıyppul salynyp, óndirildi.
Eske sala ketelik, budan buryn Atyraýda kómirqyshqyl gazyn normadan artyq shyǵarǵan kompanııaǵa aıyppul salynǵanyn jazǵan edik.