Atyraýda Reseımen shekaradaǵy kólikpen ótý oryndarynda qatań sanıtarlyq baqylaý ornatý kerek - Prezıdent
«Reseımen shekarada avtokólikpen ótetin bekettiń bolýy óńirdiń epıdemıologııalyq ahýalyna keri áserin tıgizýde. Avtokólikter ótetin shekara beketinde jaýapty mekemelerdiń úılesimdi jumys isteýin qamtamasyz etý qajet. Úkimetke ákimdiktermen birlesip, jurt shekaradan avtokólikpen ótetin oryndarǵa qatań sanıtarlyq-karantındik baqylaý ornatýdy tapsyramyn», - dedi Memleket basshysy.
QR Prezıdenti issaparǵa shyǵatyn sanıtarlyq-epıdemıologııalyq sala mamandarynyń qyzmetine barlyq jaǵdaıdy jasaýdy júktedi.
«Qazirgi tańda ártúrli shtamdar paıda bolyp, keselmen kúres qıyndaı tústi. Ókinishke qaraı, qaýipti derttiń kesirinen ultqa bereri kóp tanymal tulǵalardan da aıyrylyp qalyp jatyrmyz. Bul – búkil elimiz úshin orny tolmas qaıǵy. Memleket úshin ár adamnyń ómiri qymbat. Sondyqtan, barsha jurtty jaýapkershilik tanytýǵa, saq bolýǵa shaqyramyn. Koronavırýsty jeńýdiń eń tıimdi joly – vaktsına salý ekenin únemi aıtyp kelemin. Biz qazir halyqtyń jappaı vaktsına alýyn uıymdastyrýymyz qajet. Bul jumysta iri kásiporyndar basty nazarda bolýǵa tıis. Munaı kompanııalary qyzmetkerleriniń arasynda túsindirý jumystaryn júrgizýge aıryqsha mán berińizder», - dedi Qasym-Jomart Toqaev.
Memleket basshysy Atyraý oblysyndaǵy taǵy bir máselege, óńirdegi densaýlyq saqtaý nysandarynyń eskirgendigine basa nazar aýdardy.
«Úkimet ákimdikpen birlesip, kópbeıindi aýrýhana, psıhıkalyq densaýlyq ortalyǵyn jáne zamanaýı qalalyq emhanalar salý máselesin sheshýi kerek. Aıryqsha kútimge muqtaj balalarǵa qolaıly orta qalyptastyryp, medıtsınalyq kómek berý úshin mamandandyrylǵan saýyqtyrý ortalyǵyn salý máselesin qarastyrýdy tapsyramyn. Mektep túlekteri dáriger mamandyǵy boıynsha bilim alýy úshin grant sanyn kóbeıtý qajet. Sonymen birge, óńirde medıtsına qyzmetkerlerine qolaıly jaǵdaı jasaý kerek. Qoǵam ókilderi birneshe jyldan beri oblys ortalyǵynda sportqa erekshe qabileti bar daryndy balalarǵa arnalǵan mektep-ınternat salý máselesin kóterip júr. Úkimetke ákimdikpen birlesip bul máseleni de qarastyrýdy tapsyramyn», - dedi QR Prezıdenti.