Atyraýda polıtseıler qujatsyz janarmaı tasymaldaǵandardy ustady

ATYRAÝ. QazAqparat – Atyraý oblysynda polıtsııa qyzmetkerleri eki kólikpen qujatsyz janarmaı tasymaldaǵandardy ustady, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, Maqat aýdanynda polıtseıler 2 «Gazel» avtokóligin toqtatqan.

Tekseris kezinde kólikterge janar-jaǵarmaı tıelgeni anyqtalǵan. Janarmaıdy sorýǵa jáne aıdaýǵa arnalǵan qurylǵylar bolǵan.

«Polıtsııa qyzmetkerleri 2 kóliktiń júrgizýshisinde (1984 jáne 1992 jyly týǵan azamattar) jalpy salmaǵy 6,6 tonna bolatyn suıyqtyqqa qatysty eshqandaı qujat joǵyn anyqtady. Tárkilengen janar-jaǵarmaıǵa saraptama taǵaıyndaldy» deıdi Atyraý oblysy polıtsııa departamentiniń bastyǵy, polıtsııa polkovnıgi Qamza Úmbetqalıev.

Qazir atalǵan derek boıynsha QR Qylmystyq Kodeksiniń 197-baby boıynsha sotqa deıingi tergep-tekserý júrip jatyr.

Eske sala ketelik, budan buryn Atyraýda qarý tasymaldaǵan júrgizýshi ustalǵan bolatyn.