Atyraýda paıdalanylmaı jatqan jerler memleketke qaıtarylýda
Atyraý oblysy máslıhatynyń hatshysy Ómirzaq Zınýllın 2020 jyly ótken sessııalarda qaralyp, oń sheshimin tapqan máselelerdi atap ótti.
- Bıyl Atyraý qalasynda naqty meken-jaılar boıynsha jol salý, jaıaý júrginshiler ótkeli, aýyldyq jerlerge jiberilgen medıtsına qyzmetkerlerin áleýmettik qoldaýǵa 1 mln. teńge bólý, turǵyn úı sertıfıkattaryn kólemi men alýshylardyń tizimi bekitildi. Sondaı-aq, aýyl sharýashylyǵy jerlerin túgendeý jumystary júrgizilip, paıdalanylmaı nemese maqsatsyz paıdalanylyp otyrǵan jerlerdi memleketke qaıtarý jumystary bastaldy. Budan bólek, respýblıkalyq mańyzdaǵy «Aqtóbe-Atyraý» men «Atyraý-Astrahan RF» avtomobıl joldary qurylysy júrgizilýde, - dedi Ómirzaq Zınýllın.
Atyraý oblysy jerdiń paıdalanylýy men qorǵalýyn baqylaý basqarmasynyń málimetinshe, bıylǵy jyldyń 11 aıynda kommertsııalyq maqsatqa berilgen 16 jer ýchaskesi paıdalanylmaı bos jatýyna baılanysty, memleketke qaıtarylǵan. Jáne esepti merzimde atalmysh basqarma paıdalanylmaı jatqan jerdi qaıtaryp alý týraly sotqa barlyǵy 35 talap aryz joldaǵan.
1 qarasha kúngi resmı málimetke sáıkes, Atyraý oblysynda bıyl aýylsharýashylyǵy maqsatyndaǵy 273 800 gektar jer memleket menshigine qaıtaryldy. Oǵan sebep ýchaske ıeleriniń jerdi ýaqytyly ıgere almaýy. Jáne olardyń arasynda jerdi memleket menshigine óz erkimen qaıtaryp bergender de bar.
Aıta keteıik, jyl basynan beri ótkizilgen sessııalarda 118 sheshim qabyldanǵan. Onyń ishinde azamattardyń quqyqtary men bostandyqtaryna qatysty - 17, oblystyq bıýdjetti naqtylaý boıynsha – 6 sheshim qabyldansa, 57 sheshim oblys ákiminiń bastamasymen, 54-i máslıhat depýtatarynyń bastamasymen, jeteýi tekserý komıssııasynyń usynýymen qabyldandy.
Sonymen qatar, jıyn barysynda aımaq basshysy Mahambet Dosmuhambetov munaı salasynyń ardageri Maqsot Qılybaevqa «Atyraý oblysynyń Qurmetti azamaty» ataǵyn tabys etti.
Eske sala ketelik, oblystyq máslıhattyń 2020 jylǵy 9 jeltoqsanda ótken sessııasynda ardager munaıshy Maqsot Qılybaevqa «Atyraý oblysynyń Qurmetti azamaty» ataǵyn berý týraly sheshim qabyldanǵan bolatyn.