Atyraýda ótken jyly 2,7 mln memlekettik qyzmet kórsetilgen
Bul tizimge halyqqa qyzmet kórsetý ortalyqtarynyń, Atyraý oblysy ákimdigi qurylymdyq bólimsheleriniń, sonymen qatar áleýmettik jeli, messendjer, mobıldi qosymshalar arqyly kórsetilgen qyzmetter endi.
Atyraý oblysy ákiminiń baspasóz qyzmetiniń málimetinshe, eki jyl buryn oblysta qalalyq kommýnaldyq qyzmettiń jumysyn ońtaılandyrý baǵytynda sharalar bastaldy.
«Turǵyndar tarapynan keri baılanystyń joqtyǵy, suranymdar men shaǵymdarǵa jaı áreket etetini jaıly narazylyqtar boldy. WhatsApp qosymshasy arqyly barlyq negizgi kommýnaldyq qyzmetterge jedel jeli ashtyq, ol jumystyń jedeldigin, tıimdiligin arttyrdy», - deıdi baspasóz qyzmeti.
«Tsıfrlyq Qazaqstan» baǵdarlamasyn júzege asyrý aıasynda, memlekettik qyzmet kórsetý quraldarynyń qataryn keńeıtý úshin jergilikti atqarýshy organdar Telegram qosymshasynda «Atyraý oblastyq ákimdigi» chat-kanalyn, «Atyraý Tsıfrlyq Qabyldaý» mobıldi qosymshasyn ashty.
«Chat-kanal men mobıldi qosymshalar arqyly kórsetiletin qyzmetter jergilikti atqarýshy organdarǵa eldimekenderdegi problemalyq jaıttardy anyqtaýǵa septigin tıgizedi. Jol qozǵalysy qaýipsizdigin jaqsartýǵa, halyqpen ashyq dıalog ornatýǵa yqpal etedi. Olardy ashýdaǵy maqsat - jergilikti atqarýshy organdardyń memlekettik qyzmet kórsetýin, jaýap berýin qoljetimdi qylý. Qazir memlekettik qyzmet kórsetý protsesin ońaılatatyn taǵy birneshe onlaın-quraldar jasalyp jatyr», - deıdi Atyraý oblysy ákiminiń birinshi orynbasary Serik Shapkenov.
Telegram qosymshasyndaǵy «Atyraý oblysy ákimdigi» chat-kanaly ashylǵaly beri 2200-den astam ótinim qaraldy. «Atyraý Tsıfrlyq Qabyldaý» mobıldi qosymshasyna 2018 jyldyń qańtarynan beri kelip túskeni - 1087 ótinim. Chat-kanal men mobıldi qosymshany 7 myńnan astam adam paıdalanady.
Aıta ketelik, Atyraý oblysyndaǵy halyqqa qyzmet kórsetý ortalyqtary ótken jyly - 1 176 412 memlekettik qyzmet, al 2018 jyldyń basynan beri - 648 915 qyzmet kórsetti.
Atyraý oblysy ákimi apparaty men ákimdiktiń qurylymdyq bólimsheleri ótken jyly - 1 531 984 memlekettik qyzmet, aǵymdaǵy jyldyń basynan beri - 611 095 qyzmet kórsetken.