Atyraýda otbasynyń mazasyn alǵan 800-ge jýyq adam jaýapkershilikke tartyldy

ATYRAÝ. QazAqparat – Atyraýda bıylǵy 7 aıda otbasynyń mazasyn alǵan 800-ge jýyq adam jaýapkershilikke tartyldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, ýchaskelik polıtsııa ınspektorlarynyń mindetiniń biri – otbasylyq-turmystyq qatynasqa qatysty quqyq buzýshylyqtyń aldyn alý.

Bıylǵy jyl basynan bergi 7 aıda Atyraý qalalyq polıtsııa basqarmasynyń ýchaskelik polıtsııa ınspektorlary 800-ge adamdy QR Ákimshilik quqyq buzý kodeksiniń 73-babymen (otbasy-turmystyq qatynastar salasyndaǵy quqyqqa qaıshy áreketter) ákimshilik jaýapkershilikke tartty.

«Buǵan qosa 1000-ǵa jýyq qorǵaý nusqamasy shyǵaryldy. Atalǵan nusqamany buzǵan 60-tan astam adam anyqtaldy», -dep habarlady departamenttiń baspasóz qyzmeti.

Sondaı-aq, jyl basynan beri sot sheshimimen 300-ge jýyq quqyq buzýshynyń minez-qulqyna baılanysty erekshe talaptar belgilengen.

Eske sala ketelik, buǵan deıin Atyraýda áıelin urǵan er adam 7 kúnge qamalǵan bolatyn.