Atyraýda Otan qorǵaýshy kúni keń kólemde atalyp ótti
Mádenı shara Jambyl oblysyndaǵy «Otar» áskerı bazasynda Elbasy - QR QK Joǵarǵy Bas qolbasshysy Nursultan Nazarbaevtyń qatysýymen ótken jaýyngerlik áskerı sherýden tikeleı kórsetilimdi tamashalaýdan bastaldy.
Áskerı paradqa «Batys» aımaqtyq garnızonyna qarasty áskerı bólimsheler men Ulttyq ulan gvardııasynyń sarbazdary jáne Іshki ister departamentiniń qyzmetkerleri qatysty. Sondaı-aq, elimizdiń batystaǵy qaqpasynda shekara, qurlyq, áýe jáne teńiz kúshteri ornalastyrylǵan. Saltanatty jıynǵa saıypqyran sarbazdar ázirlikpen kelgen. Jaýyngerlik ádis-tásilderin meńgerýi, áskerı tehnıka, qarý-jaraq túrleriniń kórsetilimi qarapaıym turǵyndardyń da kóńilinen shyqty.
Shara barysynda Atyraý oblysy ákiminiń birinshi orynbasary Saǵyndyq Luqpanov barlyq qatysýshylardy tynyshtyqpen tutastyqty qorǵap júrgen jaýyngerlerimizdi ulyqtaıtyn qasterli kún - batyrlyq pen erliktiń, shydamdylyq pen tózimdiliktiń merekesi Otan qorǵaýshylar kúnimen quttyqtady.
Kontsert «Jas ulan» áskerı án baıqaýynyń júldegeri, «Batys óńirlik áskerı qolbasshylyǵynyń» aǵa serjanty Aıdar Negaevtyń oryndaýyndaǵy «Otanym meniń» ánimen ashyldy.
Sondaı-aq, «Batys óńirlik áskerı qolbasshylyǵynyń» kishi serjanty, «Jas Ulan-2016» áskerı ánder baıqaýynyń júldegeri Amanjol Muratov ta «Qarýly kúshteriń 25 jyldyǵyna arnalǵan» avtorlyq ánin naqyshyna keltirip oryndap shyqty. Sonymen qatar, Batys óńirlik áskerı qolbasshylyǵynyń kishi serjanttary, 17-shi respýblıkalyq «Jas ulan-2016» áskerı án baıqaýynyń júldegerleri Elvıra Aıazbaeva men Aıgerim Nurjanova «Za polkovnıka» ánderin oryndady.