Atyraýda órtengen úıden 25 adam evakýatsııalandy
«Atyraý qalasynyń «Avangard-4» shaǵyn aýdanynda ornalasqan 5 qabatty turǵyn úıden órt shyqty. Jalyn 4-qabattaǵy páterdiń 15 sharshy metrlik jatyn bólmesin sharpyǵan. Órt sóndirýshiler kireberis dáliz baspaldaǵy arqyly 4 jasóspirimdi qutqardy. Onyń ishinde 2003 jylǵy jasóspirim kómirqyshqyl gazyna ýlanyp qalǵan. Ol jedel járdem qyzmetkerlerine tapsyryldy», - dep málim etti oblystyq tótenshe jaǵdaılar departamentiniń qoǵammen baılanys tobynan.
Al, patrýldik polıtsııa batalonynyń qyzmetkerleri, polıtsııa aǵa leıtenanttary Ádilet Qamataı men Salaýat Ýahıtov órt shyqqan úıden 20-ǵa jýyq eresek adam men 5 jasóspirimdi evakýatsııalaýǵa kómektesken.
«Kópqabatty turǵyn úıden tútin shyqqanyn baıqap, jedel túrde joǵary qabatqa kóterildik. Maqsatymyz – turǵyndardyń qaýipsiz jerge shyǵýyna kómektesý. Sol kezde 4-qabatta es-tússiz jatqan áıeldi dalaǵa shyǵaryp, alǵashqy medıtsınalyq kómek kórsettik», - deıdi polıtsııa aǵa leıtenanty Ádilet Qamataı.
Órtti sóndirýge TJD órt sóndirý jáne avarııalyq-qutqarý jumystary qyzmetinen 12 qyzmetker men 3 tehnıka tartyldy.
Qazir órttiń shyǵý sebebi anyqtalyp jatyr.
Eske sala ketelik, buǵan deıin Teńiz ken ornynda jarylys bolyp, eki adam qaza tapqanyn habarlaǵan bolatynbyz.