Atyraýda oqýshylar jaz boıy qoǵamdyq kólikte tegin júredi
Atyraý qalalyq ákimdiginiń baspasóz qyzmetinen málim etkendeı, jazǵy demalysta orta mektep oqýshylary úshin qoǵamdyq kólikte jol júrýdi tegin etý týraly sheshim qabyldanǵan.
«Mektep oqýshylary avtobýsqa mingende, ózimen birge kólik kartasyn alyp júrýi qajet. Tasymaldanǵan benefıtsıar sanyn naqtylaý úshin kartany valıdatorǵa tıgizý kerek. Bul kezde kartadan tólem úshin aqsha alynbaıdy. Osylaısha, Atyraýdaǵy balalar men jasóspirimder kólikti jaz boıy tegin paıdalanady. Al, stýdentter qoǵamdyq kólikte jeńildetilgen tarıfpen júredi. Olar úshin jol júrý quny - 40 teńge», -dep málim etti «Smart Atyraý» KMM dırektory Arslan Aronov.
Onyń aıtýynsha, mektep oqýshylaryna sáýir aıynan beri jolaqy tolyǵymen tegin bolǵan.
Osy aıǵa deıin kúnine alǵashqy eki sapar úshin oqýshylardyń kartasynan tólem jasalmaǵan. Oqýshylar budan keıingi saparǵa jol júrý aqysyn tólegen.
Alaıda, mundaı talap Atyraý qalalyq máslıhatynyń sheshimine qaıshy kelgen. Muny Atyraý qalalyq prokýratýrasy anyqtady. Qazir bul olqylyq joıylǵan.
Eske sala ketelik, budan buryn Atyraýda avtobýs júrgizýshileri tegin júrýge tıis oqýshylardan aqsha talap etkenin habarlaǵan edik.