Atyraýda Naýryz merekesi qarsańynda jańa avtobýstar jolǵa shyqty

ATYRAÝ. QazAqparat – Atyraýda Naýryz merekesi qarsańynda jolaýshy tasymaldaıtyn 10 jańa avtobýs jolǵa shyqty, dep habarlaıdy QazAqparat tilshisi.

Atyraý qalasynyń ákimdigi baspasóz qyzmetiniń málimetinshe, birneshe kásiporyn jolaýshy tasymaldaýmen aınalysady. Sonyń biri – «Algabus» avtoparki. Bul kásiporyn jolaýshy tasymaldaýǵa arnalǵan «Yutong» markaly 10 jańa avtobýsty jolǵa shyǵardy. Qoǵamdyq kólikter endi №10 jáne 20 marshrýt boıynsha jolaýshy tasymaldaıdy.

«Qalalyq ákimdiktiń qoldaýymen satyp alynǵan jańa avtobýsta jolaýshylar otyratyn 20 oryndyq bar. Buǵan qosa, 30 adam tik turýyna bolady. Qoǵamdyq kólikte múgedektigi bar jandarǵa arnalǵan kótergish quraly ornatylǵan. Avtobýs salony jolaýshylardyń qaýipsizdigi úshin beınebaqylaý kamerasymen, jylytý jáne salqyndatqysh, GPS qondyrǵysymen jabdyqtalǵan», - dep habarlady qalalyq ákimdiktiń baspasóz qyzmeti.

Qoǵamdyq kólik Eýro-5 standartyna sáıkes ekologııalyq taza dızel otynymen júredi.

Eske sala ketelik, buǵan deıin Atyraý turǵyndary 19 jáne 22 naýryzda avtobýsta tegin júretinin habarlaǵan edik. «Smart Atyrau» kommýnaldyq memlekettik mekemesiniń dırektory Arslan Aronovtyń aıtýynsha, Atyraý qalasy men oǵan irgeles ornalasqan eldi mekenderge jolaýshy tasymaldaýǵa marshrýtqa kún saıyn 240 avtobýs jolǵa shyǵady.

«Elimizde 19 naýryzda Parlament Májilisi jáne ár deńgeıdegi máslıhattardyń depýtattaryn saılaý ótetindikten, bul kúni avtoýbstar jolaýshylardy tegin tasymaldaıdy. Atyraý qalasynyń turǵyndary men qonaqtary 22 naýryz – Ulystyń uly kúni de qoǵamdyq kólikte tegin júredi», - dep habarlady Arslan Aronuly.