Atyraýda Naýryz merekesi qalaı toılandy
Mahambet atyndaǵy akademııalyq qazaq drama teatrynyń artisteri Naýryz merekesine oraı teatrlandyrylǵan qoıylym kórsetti.
Ashyq aspan astyndaǵy tańǵajaıyp kórinisti kóktem, tabıǵattyń oıanýy, qyzǵaldaqtardyń gúldenýi beınelengen dekoratsııalar bezendirdi.
Atyraý oblysynyń ákimi Mahambet Dosmuhambetov onlaın rejımde quttyqtady.
«Naýryz meıramy ulttyq kúntizbemiz boıynsha jyldyń basy sanalady. Bıyl el Táýelsizdigi men 22 naýryzdy «Naýryz meıramy» dep jarııalaý týraly Prezıdent Jarlyǵyna qol qoıylǵanyna 30 jyl tolǵanyn aıryqsha atap ótken jón. Sondyqtan, Ulystyń uly kúni táýelsizdigimizben birge qaıta jandanyp, halyqtyń asyǵa kútetin meıramyna aınaldy. Bul mereke san ult ókilderin birlik-berekege bastaıtyn jalpyhalyqtyq merekege aınalyp úlgerdi», -dedi oblys ákimi.
Sodan keıin oblystyń shyǵarmashylyq ujymdary kontserttik baǵdarlama usyndy.
Merekelik is-sharaǵa Jylyoı, Isataı, Inder aýdandarynan bıshiler men ánshiler arnaıy keldi. «Kórisý, «Naýryz-kóje», «Bıdaı kóje», «Bata» qoıylymdary, «Shashý», «Monshaq», «Kóktem valsi», «Qýanysh bıi» horeografııalyq kompozıtsııalary kórsetildi.
Al, solıster Muratbek Jumashev, Idırbaı Baıbaqty, Raıymbek Baqytjan lırıkalyq ánderdi oryndady.
Eske sala ketelik, buǵan deıin Atyraýda sheteldik kompanııa qyzmetkerleri túski úziliste asyq oınatynyn jazǵan bolatynbyz.