Atyraýda nan qymbattady
Oblystyq aýyl sharýashylyǵy basqarmasy baspasóz qyzmetiniń málimetinshe, «Karat» JShS nan baǵasyn 90 teńgeden 95 teńgege kótergen.
«Osy kezge deıin Oral qalasyndaǵy «Jelaev astyq ónimderi kombınaty» AQ-nan alynǵan unnyń bir kelisi 155 teńge bolsa, qazir 165 teńge kóterildi. Ótken jyly Aýyl sharýashylyǵy mınıstrligi, oblystyq ákimdik pen «Azyq-túlik kelisimshart korporatsııasy» AQ arasyndaǵy memorandýmǵa sáıkes, Atyraý oblysyna 10 myń tonna bıdaı berilip, áleýmettik mańyzy bar nan baǵasy 90 teńgeden, birinshi surypty unnyń kelisi 145 teńgeden satylǵan bolatyn. Sońǵy kezde elektr energııasynyń, janar-jaǵar maı baǵasynyń qymbattaýyna baılanysty naýbaıhanalar nan baǵasyn birte-birte ósirýge májbúr bolyp otyr», - deıdi oblystyq aýyl sharýashylyǵy basqarmasynyń basshysy Amangeldi Salamat.
Onyń aıtýynsha, Atyraý oblysyna bıdaı Qostanaı, Aqmola oblystary men Oral qalasynan jetkiziledi. Bıdaıdyń bir tonnasy 99,5 myń teńgeden 125 myń teńgege kóterilgen. Qazir birinshi surypty nannyń baǵasy sýpermarketterde 85-95, kóterme baǵasy 105-110 teńgeni quraıdy.
«Úsh jaqty memorandýmǵa sáıkes, oblysqa qosymsha 1000 tonna un alyndy. Al, 2022 jylǵa óńirge 25 myń tonna bıdaı alýǵa Aýyl sharýashylyǵy mınıstrligine usynys berildi», -dep atap ótti Amangeldi Salamat.
Eske sala ketelik, buǵan deıin Atyraý oblysyna kelesi jylǵa 25 myń tonna bıdaı qajettigin habarlaǵan bolatynbyz.