Atyraýda muǵalim eski qystaý ornynan tarıhı jádigerler taýyp aldy
Mahambet aýdanynyń Esbol orta mektebinde tarıh páninen dáris beretin Jalǵas Tańatov oqýshylardy arheologııalyq qazba jumystaryna jıi aparady.
Ótken jyly ol Esbol aýylynyń aýmaǵynan kóptegen tarıhı jádiger tapqan.
Onyń aıtýynsha, alǵashqy tabylǵan jádiger – azamat soǵysy jyldaryna tıesili oq patrondary.
Bul jádiger Esbol men Aqjaıyq aýyly aralyǵyndaǵy eski qystaq ornynan tabylǵan.
«Nómirli kodyna qaraǵanda, patrondardyń biri Germanııada, endi biri Peterbýrgta shyǵarylǵany anyqtalyp otyr. Al aýyl mańyndaǵy eski egin alqabynyń ornynan Altyn Orda dáýirindegi Ózbek hannyń tusynda qoldanylǵan kádimgi mys aqsha tabyldy. Shamamen 1313-1341 jyldarǵa tıesili teńgede «721g.h», «Saraı Berke» degen jazý anyq saqtalǵan. Bulardan basqa qysh qumyralar, kúmis áshekeıler, altyn, mys tıyndar men turmystyq buıymdardy da taptyq. Jádigerdiń barlyǵy Esbol orta mektebindegi shaǵyn murajaıǵa qoıyldy», -deıdi Jalǵas Tańatov.
Muǵalimniń pikirinshe, oqýshylardyń tarıhı jádigerler qyzyǵýshylyǵy artyp otyr.
Sol sebepten, oqýshylardy tarıhı jádigerlerdi zertteýge yntasyn oıata túsýdi kózdegen.
«Bala kúnimizde qoı jaıyp júrip, qumyranyń synyqtaryn taýyp alatyn edik. Biraq ony zertteý oıymyzǵa kelmeıtin. Aýyldyń úlkenderinen Esbol aýylynyń mańynda tarıhı oryndar kóp ekenin estıtinbiz. Biri – azamat soǵysy kezindegi «aqtar» men «qyzyldardyń» shaıqasy bolǵan jer, biri – Isataı men Mahambettiń Jaıyqtan ótken joly, endi biri – arheologtar zertteý nysany retinde belgilegen ejelgi sarmattardyń qorymy. Bul aýyldyń mańynda Aıtýar bı, Murat Móńkeuly babalarymyzdyń ómirderekterindegi zerttelmeı jatqan oryndar da jeterlik. Tipti Alash arysy Halel Dosmuhamedovtiń ákesi de bizdiń aýyldan 5 shaqyrym jerde jerlengen bolyp shyqty. Ony tapqan qarapaıym aýyl turǵyny, jylqyshy aǵamyz Aslan Jalmuhanov edi», - deıdi aýyl muǵalimi Jalǵas Tańatov.
Eske sala ketelik, budan buryn Atyraý oblysynda kóne qorǵannan sarmat dáýirindegi jádigerler tabylǵanyn jazǵan bolatynbyz.
Foto: Mahambet aýdandyq ákimdigi