Atyraýda monopolıst kásiporyn kásipkerlerge eki jyl boıy kedergi keltirgen
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, 1 qyzmet 4 derbes bólikke bólingen.
«Departament qyzmetkerleri «Atyraý oblysy Sý arnasy» KMK tarapynan sý burý jáne sýmen jabdyqtaý boıynsha 1 qyzmettiń negizsiz 4 derbes qyzmetke bólingenin anyqtady. Kásiporyn bul qyzmetti jergilikti aktilermen reglamentteı otyryp, qyzmet kórsetýdiń merzimin uzartqan. Nátıjesinde 28 kúnniń ornyna qyzmet kórsetý merzimi birneshe aıǵa, al keıbir jaǵdaılarda bir jylǵa deıin uzartylǵan. Máselen, 2020-2022 jyldary 1600-den astam kásipker qyzmet alǵan», -dep habarlady departamenttiń baspasóz qyzmeti.
Kásiporyn tarapynan kelttirilgen kedergi Atyraý oblysynyń sybaılas jemqorlyqqa qarsy qyzmetiniń aralasýynan keıin ǵana oń sheshimin tapty. Monopolıst kásiporynǵa birqatar usynystar berilip, tájirıbe toqtatyldy. Qyzmet kórsetý tártibi zańnamaǵa sáıkes keltirilgen.
Eske sala ketelik, budan buryn Atyraýda atalǵan monopolıst kásiporyn 99 kásipkerge 739 mln teńge qaryz bolǵanyn habarlaǵan edik.
«Atyraý oblysy Sý Arnasy» KMK-nyń 99 kásipkerlik sýbektisine 739 mln qaryz ekeni anyqtalǵan. Bul – kórsetilgen qyzmetter men taýarlardy jetkizgeni úshin tólenbegen qarjy.
Osyǵan baılanysty departament pen ákimdik tıisti sharalar qabyldady. Sonyń nátıjesinde 49 kásipkerlik sýbektisine 587 mln teńge tólendi. Osylaısha, 49 kásipkerlik sýbektisiniń quqyǵy qorǵaldy.