Atyraýda mol jaýǵan qardan sý tasqyny qaýpi týyndaýy múmkin

ATYRAÝ. QazAqparat – Atyraý qalasynda qardyń kóp túsýine baılanysty kóktemde sý basý qaýpi týyndaýy múmkin, dep habarlaıdy QazAqparat.

Oblys ákiminiń orynbasary Qaırat Nurtaev Atyraý qalasyndaǵy sý basý qaýpi basym shaǵyn aýdandardaǵy qar tazalaý jumystaryn qadaǵalady.

Onyń ishinde Geolog, Juldyz, Saryqamys shaǵyn aýdandary bar.

«Atyraý qalasynda iri kásiporyndardyń kómegimen qar tazalaý jumystary táýlik boıyna júrgizilip jatyr. Tehnıka sany kóbeıtildi. Qazir 120-ǵa jýyq kólik pen qar kúreıtin 130-dan astam tehnıka bar. Turǵyndar aýlalardaǵy qardy kóshege shyǵarýy kerek. Keıin kóshedegi qardy jaýapty mekemeler jınap alady. Turǵyn úılerdi osylaı sý basý qaýpinen saqtaımyz. Іri mekemeler, saýda ortalyqtary belgilengen aýmaqtardy qardan tazalaýy tıis. Qaýipti aýmaq sanalatyn Saryqamys, Geolog shaǵyn aýdandaryn qardan tazalaýǵa basymdyq berilip otyr. Bir aptada qalany qar men sýdan tolyqtaı tazalaımyz», -dedi Qaırat Nurtaev.

Alaıda, qalada áli qardan tazalanbaǵan oryndar bar.

Máselen, «Kóktem» saýda ortalyǵynyń aýmaǵyndaǵy qar áli kóshege shyǵarylmaǵan.

Oblys ákiminiń orynbasary Qaırat Nurtaev bazardyń jaýapty qyzmetkerine eskertý berdi.

Qazir Atyraý qalasynda qar tazalaý jumystaryna «Arnaýlyavtobaza» JShS-dan 39 tehnıka, iri kásipoyndar men jeke kásipkerlerden 86 tehnıka tartylǵan.

Osy kezge deıin shahar aýmaǵynan 52 myń tekshe metr qar shyǵarylǵan. Al, jaıaý júrginshiler, avtokólik joldaryna, kópirlerge 516 tonna reagent sebilgen.

Eske sala ketelik, budan buryn Atyraýdy qalyń qar basyp, kólik qozǵalysy qıyndaǵanyn jazǵan bolatynbyz.