Atyraýda «Mereıli otbasy» baıqaýynyń jeńimpazdary anyqtaldy

ATYRAÝ. QazAqparat - Atyraý oblysynda «Mereıli otbasy» ulttyq baıqaýynyń úzdikteri anyqtaldy. Óńirde jeńiske jetken eki otbasy kúzde respýblıkalyq deńgeıdegi baıqaýǵa Atyraý oblysy atynan qatysatyn bolady, dep habarlaıdy «QazAqparat» HAA tilshisi.

«Ár aýdan men Atyraý qalasynan qatysýshylardyń jalpy sanynan tórt otbasy iriktelip alyndy, olardyń qujattary konkýrstyq komıssııaǵa joldandy. Ótken jyly Atyraý oblysynda «Mereıli otbasy» baıqaýyna 87 otbasy qatyssa, bıyl olardyń sany 97-ge jetti», - dedi oblystyq ishki saıasat basqarmasy basshysynyń mindetin atqarýshy Zlıha Talasbekova.

Onyń aıtýynsha, baıqaý qatysýshylary otbasylarynyń tarıhy týraly baıandaıtyn qysqasha vıdeofılm túsirgen. Onda otaǵasynyń eńbek jolyndaǵy jetistikteri, olardyń balalary, nemereleri men shóbereleri týraly baıandalǵan. Eresekterdiń eńbek jolyndaǵy jetistikteri esepke alynsa, olardyń balalary men nemereleriniń - sporttaǵy nemese oqýdaǵy jetistikteri jeńimpaz atanýda basty ról oınady. Baıqaý barysynda otbasynyń eresek músheleriniń jalpy eńbek ótili, olardyń el nemese óńir ekonomıkasynyń damýyna qosan úlesteri nazarǵa alynǵan.

Oblys ákimi Nurlan Noǵaevtyń tóraǵalyǵymen konkýrstyq komıssııa otyrysy ótken, onda 32 otbasynyń qujattary qaralǵan.

Baıqaý nátıjesi boıynsha, ulttyq konkýrstyń respýblıkalyq kezeńine Atyraý oblysy atynan Asabaevtar men Jumaǵazıevter otbasy qatysatyn bolady.