Atyraýda memorgan 50 teńge turatyn suıytylǵan gazdy 84 teńgeden satyp almaq boldy
Atyraý oblysy boıynsha sybaılas jemqorlyqqa qarsy is-qımyl departamenti memlekettik satyp alý júıesine monıtorıng júrgizip jatyr.
Onyń barysynda Atyraý oblysy «Sý arnasy» QQS-syz jalpy somasy 29 988 000 teńgege lıtrine 84 teńgege 357 000 lıtr tabıǵı suıytylǵan gaz satyp alǵany belgili boldy.
Básekelestikti qorǵaý jáne damytý agenttiginiń 5 qańtardaǵy buıryǵyna sáıkes shalǵaı aýdandardy qospaǵanda 1 lıtrge QQS qosa alǵanda shekti bólshek saýda baǵasy belgilengen. Oǵan sáıkes Atyraý oblysynda 1 lıtr suıytylǵan gazdyń baǵasy - 50-55 teńge.
Osylaısha, Atyraý Sý arnasy taýar baǵasyn 12 138 000 teńgege kóterdi. Bul somaǵa taǵy 242 760 lıtr satyp alýǵa bolady.
Departament óz kezeginde tapsyrys berýshige baǵany tómendetý týraly usynys hat joldady.
Suıytylǵan gazdy jetkizýge kelisimshart jasasqan Integra-N JShS jaýapkershilikten jaltarǵan. Osyǵan baılanysty Atyraý oblysy Sý arnasy Atyraý oblysynyń mamandandyrylǵan aýdanaralyq ekonomıkalyq sotyna aryz berdi.
Sondaı-aq, Mahambet aýdandyq aýrýhanasynda 5 318 mln teńge somasyna bıýdjet qarajatynyń tıimsiz jumsalýynyń joly kesildi.
Memlekettik organ ushqynmen tutanatyn qozǵaltqysh úshin jalpy somasy 11 600 000 teńgege 46400 lıtr benzın, 1 lıtr - 250 teńge jáne 30000 lıtr dızel otynyn jalpy somasy 9 870 000 teńgege, 1 lıtr – 329 teńge satyp alý tapsyrysyn jarııalaǵan.
Departament baǵany tómendetý týraly usynys hat joldady. Óz kezeginde Mahambet aýdandyq aýrýhanasy satyp alý baǵasyn tómendetip, 15 mln teńge bıýdjet qarajatyn únemdedi.
Atyraý oblysynyń sybaılas jemqorlyqqa qarsy qyzmeti 377 mln teńge, al 2022 jyldyń birinshi toqsanynda shamamen 25 mln teńge únemdedi.