Atyraýda mekteptiń elektr jelisinen aqaý shyǵyp, oqýshylar qashyqtan oqýǵa jiberildi
Oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 20 qańtarda tańerteń Jambyl atyndaǵy №21 orta mekteptiń elektr jelisinen aqaý shyqqan. Sonyń saldarynan jeli tútindegen.
«Bul bilim ordasy Atyraý qalasynda ornalasqan. Elektr jelisinen aqaý shyqqan kezde mektep ǵımaratynda oqýshylar bolmaǵan. Qysqa tuıyqtalýdyń saldarynan elektr jelisiniń qalqany ornalasqan bólmeden tútin shyqqan. Osyǵan baılanysty, oqıǵa ornyna tótenshe jaǵdaılar departamentiniń arnaıy bes tehnıkasy jiberildi. Biraq, aqaýdyń saldarynan ashyq janý deregi tirkelgen joq», - dep habarlady departamenttiń qoǵammen baılanys tobynan.
Oblystyq bilim basqarmasy baspasóz qyzmetiniń aqparatyna sáıkes, 20 qańtarda tútin shyqqandyqtan, Jambyl atyndaǵy №21 orta mekteptegi sabaq onlaın formatqa kóshirilgen. Qashyqtyqtan oqýǵa 1 289 oqýshy, sondaı-aq 112 pedagog jiberildi.
Eske sala ketelik, budan buryn Atyraýda orta mekteptiń dırektorynan týberkýlez derti anyqtalǵanyn jazǵan edik.
«Qazir týberkýlez dertine shaldyqqan mektep dırektory densaýlyǵyna baılanysty jumysynan shettetildi. Mektep dırektorymen jumys babynda qarym-qatynasta bolǵan qyzmetkerler medıtsınalyq tekserýden ótkiziledi. Mektep ǵımaratyna tıisti sanıtarııalyq is-sharalary júrgizilip jatyr», -dep habarlady Atyraý qalalyq bilim bóliminen.