Atyraýda mektep bitirgen 150 túlekke oblys ákiminiń bilim granty berildi
Oblystyq bilim basqarmasy baspasóz qyzmetiniń málimetinshe, oblys ákiminiń orynbasary Baqytgúl Hamenovanyń tóraǵalyǵymen ótken konkýrs komıssııasynyń sheshimimen 150 túlek oblys ákiminiń grantymen joǵary oqý oryndarynda tegin oqıdy.
«Óńirdegi kadr tapshylyǵyn sheshý úshin oblystyq bıýdjet esebinen densaýlyq, bilim, aýyl sharýashylyǵy jáne basqa da mańyzdy salalar boıynsha bilim berý granttary bólinip otyr. Bıyl konkýrsqa qatysýǵa 186 talapker ótinish berdi. Oblys ákiminiń grantyn ıelengenderdiń deni – bolashaq pedagogter jáne dárigerler», -deıdi oblystyq bilim basqarmasynyń basshysy Satqan Esenǵalıev.
Onyń aıtýynsha, 52 túlek M.Ospanov atyndaǵy Batys Qazaqstan memlekettik medıtsınalyq ýnıversıtetine, 2 túlek L.Gýmılev atyndaǵy Eýrazııa ulttyq ýnıversıtetinde oqıdy. Al, 8 túlek «Nur-Múbarak» Mysyr ıslam mádenıeti ýnıversıtetinde, al, 86 túlek H.Dosmuhambetov atyndaǵy Atyraý ýnıversıtetinde, taǵy ekeýi M.Ótemisov atyndaǵy Batys Qazaqstan memlekettik ýnıversıtetinde joǵary bilim alady.
Eske sala ketelik, budan buryn Atyraý oblysy ákiminiń 50 granty rezıdentýraǵa bólingen edi.