Atyraýda mas júrgizýshiniń biri 20 kúnge qamalyp, ekinshisi 7 jylǵa júrgizýshi kýáliginen aıyryldy

ATYRAÝ. QazAqparat – Atyraýda júrgizýshi quqyǵy joq jáne mas kúıinde kólik rýline otyrǵan júrgizýshi 20 táýlikke qamaýǵa alyndy. Taǵy bir júrgizýshi 7 jylǵa sottaldy, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etilgen mas kúıde rýlge otyrǵan júrgiýzshi keshe, 22 maýsymda ustalǵan.

«Polıtsııa qyzmetkerleri jergilikti ýaqytpen saǵat 17:00 shamasynda Atyraý qalasyndaǵy M.Baımuhanov kóshesiniń boıynda Skoda Octavia avtokóligin toqtatqan. Tekserý kezinde rýlde otyrǵan 1988 jylǵy er adamnyń júrgizýshi kýáligi joq ekeni anyqtaldy. Medıtsınalyq kýálandyrý nátıjesinde orta dárejeli mas kúıde bolǵany dáleldendi. Ol Atyraý oblystyq narkologııa dıspanseriniń ýaqytsha beıimdeý bólimine ornalastyryldy», -dep habarlady deprartamenttiń baspasóz qyzmeti.

Mas júrgizýshge qatysty QR Ákimshilik quqyq buzý týraly kodeksiniń 608-babynyń 6-bólimine sáıkes ákimshilik is-qujattary jınaqtaldy.

Atyraý qalasynyń ákimshilik quqyq buzýshylyqtar jónindegi mamandandyrylǵan sotynyń qaýlysymen 35 jastaǵy azamat 20 táýlikke ákimshilik qamaqqa alyndy.

Al, Mahambet aýdandyq sotynyń qaýlysymen 35 áıel kólik júrgizý quqyǵynan 7 jylǵa aıyryldy.

«Mahambet aýdanynyń 36 jastaǵy turǵyny Saraıshyq aýylynda kólik quralyn alkogolge mas kúıinde júrgizgeni anyqtaldy. Onyń isi QR Ákimshilik quqyq buzý týraly 608-babynyń 1-bóligimen qaraldy. Іsti qaraý kezinde áıeldiń 14 jasqa deıingi balalary bary eskerilip, 7 jylǵa kólik júrgizý quqyǵynan aıyrý jazasy taǵaıyndaldy», -dep habarlady sottyń baspasóz qyzmeti.

Sot qaýlysy zańdy kúshine endi.

Eske sala ketelik, budan buryn Atyraýda jol apatynan bir otbasy músheleri túgeldeı kóz jumǵanyn jazǵan edik.