Atyraýda mas kúıde kólik júrgizgen jigit bas bostandyǵynan aıyryldy

ATYRAÝ. QazAqparat – Atyraýda mas kúıde kólik rýline otyrǵan jigit 6 aıǵa bas bostandyǵynan aıyryldy, dep habarlaıdy QazAqparat.

Oblystyq polıtsııa departamentiniń baspasóz qyzmetinen málim etkendeı, jyl basynan beri júrgizýshi kýáliginen aıyrylǵan jáne alkogoldik, esirtkilik, ýytqumarlyq masań

kúıdegi adamnyń kólik quralyn basqarǵan 32 adam ustalǵan.

«Keshe patrýldik polıtsııa qyzmetkerleri túngi saǵat 02:45-de «Atyraý-Dossor» tas jolynyń boıynda «VAZ – 211440» kóligin toqtatty. Kólik rýlinde Mahambet aýdanynda

turatyn 27 jastaǵy jigit bolǵan. Tekserý kezinde jas jigittiń buryn júrgizýshi kýáliginen aıyrylǵany belgili boldy. Soǵan qaramastan rýlge alkogoldik ishimdik iship, mas kúıde otyrǵany anyqtaldy», -dep habarlady departamenttiń baspasóz qyzmeti.

Mas kúıinde kólik basqarǵan jigitke qatysty toltyrylǵan hattama sotqa joldandy. Jas jigit sot otyrysynda óziniń kinásin moıyndady. Sot úkimimen ol QR Qylmystyq kodesiniń 346-babynyń 1-bóligimen kináli dep tanylyp, kólik quralyn júrgizý quqyǵynan ómir boıyna aıyrylyp, 6 aı merzimge bas bostandyǵynan aıyrý jazasy taǵaıyndaldy.

Eske sala ketelik, budan buryn Atyraýda jyl basynan beri 251 júrgizýshi kólik júrgizý quqyǵynan aıyrylǵanyn habarlaǵan bolatynbyz.