Atyraýda mamandandyrylǵan jańa HQO ashyldy
Mamandandyrylǵan HQO-nyń ashylý saltanatyna Atyraý oblysynyń ákimi Nurlan Noǵaev qatysty.
«Búginde aımaqtaǵy barlyq salada tsıfrlandyrý memlekettik baǵdarlamasy qarqyndy túrde júzege asýda. Endi avtokólik ıelerine memlekettik qyzmet tsıfrly úlgide kórsetiledi, bul úrdis qyzmet kórsetý sapasy men jyldamdyǵyna oń yqpal eteri anyq», - dedi Nurlan Noǵaev nysannyń ashylý saltanatynda.
Aıta keteıik, mamandandyrylǵan HQKO-nyń qaıtadan ashylǵan ǵımaratynyń arqasynda atyraýlyqtar avtokólikterin tez arada tirkep, júrgizýshi kýáligi men memlekettik nómir belgilerin ala alady. Jańa nysanda júrgizýshi kýáligin alýǵa teorııalyq test pen praktıkalyq synaqtardy tapsyrýǵa bolady.
Atyraý oblysynyń ákimi mamandandyrylǵan ortalyqtyń jańa ǵımaratymen tanysyp, mekeme qyzmetkerlerimen áńgimelesti. Ortalyqta 32 qyzmetker halyqqa qyzmet kórsetedi.
«Mamandandyrylǵan HQO-nyń syıymdylyǵy 800 adamǵa eseptelgen, jeńil avtokólikterge arnalǵan 200 oryndyq, júk kólikterine 20 oryndyq avtoturaq qarastyrylǵan», - deıdi «Azamattarǵa arnalǵan úkimet» memlekettik korporatsııasynyń Atyraý oblystyq bólimshesiniń basshysy Musa Haırýllıev.
Ortalyqty iske qosý arqyly Nursaıa yqsham aýdanyndaǵy polıtsııa bóliminiń jumysy jeńildeıdi, atalǵan polıtsııa bólimshesiniń aldyndaǵy jolda kólikterdiń kóptiginen únemi keptelis bolatyn.
Qyzmet túrlerin HQKO operatorlary men ákimshilik polıtsııa qyzmetkerleri kórsetedi, olardyń mindetteri naqty bólinedi. Ortalyq operatorlary qajetti qujattardy qabyldaıdy, al ákimshilik polıtsııa qyzmetkerleri júrgizýshi kýáligin jáne tehnıkalyq kýálikterdi daıyndaıdy. Osylaısha, azamattar men qujattar daıyndaýǵa jaýapty qyzmetker arasynda tikeleı baılanys joıylady