Atyraýda Mahambetke arnalǵan aqyndar músháırasynyń jeńimpazy anyqtaldy
Atyraý oblystyq Mádenıet, tilderdi damytý jáne arhıv isi basqarmasynyń basshysy Ábil Jolamanovtyń aıtýynsha, músháıraǵa «Tartynbaı sóıler asylmyn» taqyryby tańdalǵan. Respýblıkalyq jazba aqyndar músháırasyna elimizdiń ár óńirinen 18-40 jas aralyǵyndaǵy 19 aqyn qatysty.
«Músháırany ótkizýdegi maqsat – Mahambettiń aqyndyq qýatyn óleńderi arqyly keıingi býynǵa nasıhattaý, otanshyldyq qasıetti jastardyń boıyna darytý. Jas býyn ókilderiniń ana tiline, babadan muraǵa qalǵan sheshendik ónerge baýlýdy kózdedik. Jas aqyndar osyndaı músháıraǵa qatysyp, shyǵarmashylyq sheberligin shyńdaıdy. Keıingi býynnyń qazirgi qazaq poezııasyna degen qushtarlyǵyn oıatyp, rýhanı tárbıesin jetildirgenin qaladyq», - deıdi Ábil Jolamanov.
Saıysta aqyndar aldymen óz óleńin oqydy. Sodan soń Mahambet shyǵarmalarynan úzindini jatqa aıtty. Sońynda 8-10 mınýtta óleń jazyp, sýyrypsalmalyq qabiletin tanytty.
«Aqyndarǵa qoıylǵan talap óte kúrdeli boldy. Sóz tapqyrlyǵy, óleń maǵynasynyń tereńdigi, shýmaq uıqasynyń kúrdeliligi, ádebı teńeý, epıtet, metafora, kórkem mátinniń oryndalý sheberligi, daýys máneri men til tazalyǵyna, sahna mádenıetine nazar aýdaryldy», - deıdi Jazýshylar odaǵynyń tóraǵasy Mereke Qulkenov.
Qazylar alqysynyń sheshimimen atyraýlyq aqyn Asylanbek Shyǵyrov bas júlde jeńip aldy. Al Batys Qazaqstannan oblysynan qatysqan Ádilet Orynbasarov І oryndy, pavlodarlyq Jarqyn Ábý ІІ oryndy, mańǵystaýlyq Jumagúl Mursal ІІІ oryndy ıelendi.
Ózge qatysýshylarǵa H.Erǵalıev, Á.Sársenbaev, M.Satybaldıev, J.Nájimedenov, F.Ońǵarsynova, A.Ershýov, M.Otaralıev, N.Ájiǵalıev, T.Dosymov, D.Jazyqbaev, M.Netalıev, Q.Saǵıev, A.Ótegenov, Q.Orazov, K.Nábıeva atyndaǵy arnaıy júlde berildi.