Atyraýda qyzylsha tabylǵan mektepte keı synyptar onlaın oqıdy
Oblystyq bilim basqarmasynyń basshysy Gúlnar Sádýaqasovanyń málimetinshe, qyzylsha juqtyrǵan 3 oqýshy Jańatalap aýylyndaǵy mektepte oqıdy.
«Jańatalap aýylynyń Jambyl atyndaǵy orta mektebiniń 5-synybynan 1, 3-synybyndaǵy 2 oqýshy qyzylsha juqtyrǵan. Osyǵan baılanysty 3-synyp pen 5-synyptyń oqýshylaryn 25 sáýir men 2 mamyr aralyǵynda qashyqtyqtan oqytý formatyna kóshirýge sheshim qabyldadyq. Óıtkeni, sol synyptardyń kabınetine dızenfektsııa men tazalyq jumystary júrgizilýi kerek», - dedi Gúlnar Sádýaqasova.
Atyraý oblystyq sanıtarııalyq-epıdemıologııalyq baqylaý departamentiniń basshysy Mádenıet Tanaýovtyń deregine súıensek, 2 naýryz – 24 sáýir aralyǵynda alǵashqy dıagnozy boıynsha qyzylshaǵa kúdikti 15 jaǵdaı tirkelgen.
«Onyń ishinde 6 adamnan qyzylsha aýrýy zerthanalyq jolmen dáleldendi. Al, 4 jaǵdaı boıynsha zerthanalyq tekserý qorytyndysy teris nátıje berdi. Endi 5 jaǵdaıǵa baılanysty zertteý qorytyndysy júrgizilip jatyr. Oǵan qosa naýqastarmen qarym-qatynasta bolǵan 216 adam medıtsınalyq baqylaýǵa alyndy. Epıdemıologııalyq kórsetkish boıynsha 7 adamǵa qyzylshaǵa qarsy vaktsınatsııalaý jumystary júrgizildi. Qazir sanıtarlyq-epıdemıologııalyq tekserý jalǵasyp jatyr», - dep máli etti Mádenıet Tanaýov.
Eske sala ketelik, budan buryn Atyraý oblysynda sońǵy tórt jylda alǵash ret qyzylsha juqtyrǵandar tirkelgenin habarlaǵan bolatynbyz.
Atyraý oblystyq sanıtarııalyq-epıdemıologııalyq baqylaý departamentiniń bólim basshysy Aınagúl Sársenǵalıevanyń aıtýynsha, qyzylshamen 14 jasqa deıingi jasóspirimder aýyrǵan.
«Atyraý oblysynda qyzylsha aýrýy sońǵy ret 2019 jyly tirkelgen edi. Tórt jyldan keıin bıylǵy naýryz aıynda atalǵan aýrýdyń 4 jaǵdaıy tirkeldi. Alǵashqy jaǵdaı bizge shet elden kelgen jasóspirimnen anyqtaldy. Túrkııa elinen kelgen azamattyń balasy vırýsty sol jaqtan juqtyryp kelgen», -dedi Aınagúl Sársenǵalıeva.