Atyraýda qus tumaýyna qarsy úı qustaryn egýge 6 291 doza vaktsına bólindi
Oblystyq aýmaqtyq ınspektsııasy basshysynyń mindetin atqarýshy Myrzabek Dúısenovtiń aıtýynsha, Atyraý qalasyndaǵy 7 aýyldyq okrýg turǵyndarynyń úı qustaryn egý josparlanǵan.
Búginge deıin 4 okrýg turǵyndarynyń ıeligindegi 2 382 qus túgeldeı egilgen. Al, 3 okrýgtegi úı qustaryn osy aptanyń sońyna deıin egý kózdelip otyr.
«Atyraý oblysynda soltústik Kaspıı jobasynyń operatory – «Nort Kaspıan Opereteıng Kompanı N.B.» kompanııasy ıgerip jatqan «Qashaǵan» ken ornyna qarasty DS-04 jáne DS-01 jasandy aralynda shaǵalanyń birneshe túrinen qus tumaýy aýrýy anyqtalǵan bolatyn. Osyǵan baılanysty Atyraý qalasynyń aýmaǵynda ornalasqan 7 okrýgte 1 200 qaz ben 5 091 taýyqqa qus tumaýy aýrýyna qarsy egý qolǵa alyndy. Bul úshin veterınarııalyq preparattardyń respýblıkalyq qorynan 6 291 doza vaktsına bólindi. Egý jumystary 1 shildede bastaldy. Qazir úı qustaryn egý jumystaryn «Epızootııaǵa qarsy respýblıkalyq otrıady» RMM-nyń Atyraý fılıaly men kórshiles Batys Qazaqstan oblysynan 12 adamnan jasaqtalǵan 4 brıgada atqaryp jatyr», -deıdi Myrzabek Dúısenov.
Budan buryn Atyraý oblysynda qyrylǵan qustardyń sany 5 myńnan asqan bolatyn. Qara shubar tuqymdy shaǵalanyń jappaı qyrylý deregi 19 maýsymda «Qashaǵan» ken ornyndaǵy eki jasandy aralda anyqtalǵan. Qyrylǵan qustardyń sany – 2 750.
Soǵan baılanysty Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynda qurylǵan komıssııa músheleri qustar qyrylǵan jerge baryp, onda profılaktıkalyq tekserýler júrgizdi. Sol jerden sý, topyraq jáne aýa synamalary, qustardyń ólekseleri zertteýge alyndy.
«Bes kúnnen keıin, ıaǵnı 24 maýsymda Veterınarııalyq baqylaý jáne qadaǵalaý komıtetiniń veterınarııa boıynsha ulttyq referenttik ortalyǵynan ólgen qustardyń synamalarynan AN5 qus tumaýyna oń nátıje anyqtalǵany týraly jaýap keldi. Osyǵan baılanysty Atyraý oblysynyń aýmaǵynda quzyretti organdardyń qatysýymen uqsas jaǵdaılardy anyqtaý maqsatynda tolyq baqylaý monıtorıngi júrgizildi.
26 maýsymda Kaspıı teńiziniń soltústik bóliginde ornalasqan Shalyga aralyndaǵy «Aqjaıyq» memlekettik tabıǵı rezervatynyń aýmaǵynda 2500 shaǵalanyń ólý deregi anyqtaldy. Onyń ishinde 1000 «Chegrava», 1 200 «Qara bas ógizshaǵala», 300 «Ógizshaǵala» tuqymdy qus qyrylǵan», -dep málim etken edi oblystyq ákimdiktiń baspasóz qyzmetinen.