Atyraýda Qurban aıttyń birinshi kúni qoı baǵasy 120 myń teńgege deıin kóterildi
Búgin elimizde úsh kúndik Qurban aıt bastaldy. Atyraýda qurban malyn shalýǵa nıet etkender qatary kóp. Alaıda, mal baǵasy sharyqtap shyǵa keldi.
Máselen, Atyraýda Reseıdiń Astrahan oblysymen shekaraǵa deıin qatynaıtyn tasjoldyń janyndaǵy mal bazarynda qoı satýshylar da az emes.
Bazardyń ishine syımaǵan satýshylar malyn dalada saýdalap tur. Olardyń baǵasy bazar ishindegiden arzandaý ekeni baıqalady.
Bul bazarǵa qoı Batys Qazaqstan oblysynan, Atyraýdyń Qyzylqoǵa, Qurmanǵazy, Inder aýdarynan ákelingen.
Bazardaǵy baǵaǵa toqtalar bolsaq, tusaq úshin 60-65 myń teńge suraıdy.
Erte týǵan qozylardyń eń tómengi baǵasy – 35 myń teńge. Munda bir qoıdy úsh myń teńgege soıyp beredi.
Іri qaranyń baǵasy 370 myń teńgeden bastalady. Bul – úsh jasar ógizdiń baǵasy. Al, urǵashy sıyrdyń eń arzany – 400 myń teńge.
«Ózim baqqan ógizdi satýǵa ákeldim. Shamamen 350 keli tartatynyna senimdimin. Salmaǵyna, qońyna baılanysty 700 myń teńgege satamyn. Budan tómen baǵaǵa bere almaımyn», -deıdi Inder aýdanynan kelgen er adam.
Atyraýlyq mal alý úshin kóp baratyn bazardyń biri «Týma» dep atalady. Qalanyń ortalyǵynda ornalasqan bul saýda ornyndaǵy baǵa ózgelerinen qymbattaý kórinedi.
Munda qozyny 40 myń teńgege satyp alýǵa bolady. Іri qoı 100 myń teńge baǵalanyp tur.
Al, semiz isek úshin 120 myń teńge suraıdy. Bul bazarda ár qoıdy soıý baǵasy – tórt myń teńge.
«Jyl saıyn Qurban aıt jaqyndaǵanda mal baǵasy sharyqtap shyǵa keledi. Saýap jınaıtyn kúnderi muny retteıtin tetik joq pa? Bir isekti 120 myń teńgege satyp alý múmkin emes», -deıdi qala turǵyny Nurlan Tájiǵalıuly.
Eske sala ketelik, budan buryn Atyraýda Qurban aıt kezinde mal soıý pýnktteriniń jumysyn qadalaǵaý kúsheıtiletinin habarlaǵan edik.