Atyraýda Qurban aıtta 14 kıiz úı tigilip, 10 myń balaǵa syılyq beriledi
Atyraý oblysynyń bas ımamy Altynbek Utyshanulynyń aıtýynsha, erteń, 28 maýsymda Qurban aıt meıramynyń alǵashqy kúni keń aýqymda atalyp ótedi.
«Qasıetti Qurban aıt eldiń birligin nyǵaıtyp, ózara baýyrlastyqty arttyrady. Aıt kúnderi shamasy jetken adam qurbandyq shalady. Bıyl Atyraý qalasyndaǵy Isataı-Mahambet ortalyq alańynda Qurban aıt merekesine oraı 14 kıiz úı tigiledi. Jergilikti ónerpazdar óner kórsetedi. Turǵyndar aıtyskerler men kúıshilerdiń ónerin tamashalaıdy», - dedi Altynbek Utyshanuly.
Atyraý oblysynda aıt namazy jergilikti ýaqytpen tańǵy saǵat 6:30-da oqylady. Sodan soń buqaralyq sıpattaǵy aýqymdy is-sharalardy ótkizý josparlanǵan.
«Qurban aıt meıramyna oraı óńirdegi meshitter 10 myń balaǵa arnaıy syılyq úlestiredi. Nıet etip, shalynǵan qurban malynyń eti áleýmettik turmysy tómen toptaǵy otbasylarǵa taratylady», - dep málim etti A. Utyshanuly.
Bas ımamnyń deregine súıensek, mereke kúnderi Atyraý qalasyndaǵy Kókarna eldi mekeni men «Saryqamys» shaǵynaýdanynda, «Atyraý-Dossor» baǵytynda qatynaıtyn tasjoldyń boıyndaǵy «Juldyz» jáne «Birlik» shaǵynaýdandarynyń qıylysyndaǵy arnaıy orynda mal satylady. Al qurbandyqqa shalynatyn mal «Adal», «Asyl-Agro», «Týma bazary» mal bazarlarynda, «Atyraý et ortalyǵy» men «Qýanysh» jeke kásipkerliginiń alańynda soıylady.
Eske sala ketelik, ótken jyly Atyraýda Qurban aıttyń birinshi kúni qoı baǵasy 120 myń teńgege deıin kóterilgen bolatyn.