Atyraýda Quran baǵyshtalyp, qurbandyq shalynýda

ATYRAÝ. QazAqparat - Ulyq mereke Atyraýda oblystyń Bas ımamy Altynbek Utyshanulynyń Quran baǵyshtaýymen bastaldy, dep habarlaıdy Atyraý oblystyq «Imanǵalı» ortalyq meshitiniń resmı saıty.

Ondaǵy málimetterge qaraǵanda, koronavırýs indetine baılanysty onlaın formatta qurban shalý Atyraý qalasynda tórt orynda atqarylýda. Atap aıtqanda, qazirgi ýaqytta Atyraýda «Týma», «Asyl agro», «Adal», «Qýanysh» JK bazarlarynda qurban shalý rásimi jalǵasyp jatyr. Onda shtab jáne ortalyq «Imanǵalı» meshiti janynan qurylǵan arnaıy brıgadalar jumys isteýde.

Qurban aıt meıramynda eń basty jasalatyn amal – qurban shalý.

Atyraýlyqtardy ulyq merekemen quttyqtaǵan Atyraý oblysynyń Bas ımamy Altynbek Utyshanuly álemdi jaılaǵan indetke baılanysty, kópshiliktiń suraýymen elimizde alǵash ret qurbandyq shalý qashyqtan uıymdastyrylyp otyrǵanyn atap ótti.

«Búgingi tańda Atyraý oblysy ákimdigimen birlesip, «Imanǵalı» meshiti qurban malyn tapsyrysqa saı tańdap alyp, qurbandyq shalýdy jáne qurban malynyń etin tolyqtaı muqtaj otbasylarǵa taratýdy uıymdastyryp otyr.

Qurban shalýdy qazaq halqy bolmysyna sińirip aldy. Búginde ulyq kún memlekettik deńgeıdegi merekege aınaldy.

Qanshama halyq Alladan eldiń amandyǵyn surap, qurbandyq shalýda. Osynaý izgi amalymyzben Allaǵa jaqyndaı túsýdi jáne duǵalarymyzdy qabyl etýdi násip etkeı» degen Atyraý oblysynyń Bas ımamy Altynbek Utyshanuly ulyq merekede ata-ana, baýyrlar, aǵaıyn, kórshi-qolańmen aradaǵy qatynasty jaqsarta túsýge amal etýge úndedi.

Eske sala ketelik, qurbandyq shalýǵa tapsyrys berý men muqtaj jandardan ótinish alý úshin Qurban2020.kz saıty jumys isteýde. Búginde saıt arqyly 300-den asa atyraýlyq qurban shalýǵa ótinish berip úlgergen.

Atalmysh saıt arqyly qurban shalýǵa onlaın tapsyrys berý 1 tamyzǵa deıin jalǵasady.