Atyraýda QTJ fılıalynyń dırektory qamaýǵa alyndy
Bul týraly Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Nurlan Jahın málim etti.
«Fılıal dırektory Eleýbaı Saparovqa qatysty sotqa deıingi tergeý júrgizilip jatyr. Ol qyzmettik laýazymyn asyra paıdalanyp, kásipkerdiń 1 500 000 teńge kólemindegi aqshalaı qarajatyn ıemdendi degen kúdikke ilindi. Qazir oǵan qatysty Atyraý qalasynyń tergeý soty «qamaýda ustaý» bultartpaý sharasyn tańdaldy», - dedi Nurlan Jahın.
Ózge aqparat QR Qylmystyq protsestik kodeksi 201-babynyń 1-bóligine sáıkes tergeý múddesi úshin jarııa etilmeıdi.
«Biz «Qazaqstan temir joly» AQ qyzmetinde birqatar problemalar baryn bilemiz. Kóptegen sybaılas jemqorlyq táýekeli anyqtaldy. Máselen, dıspetcherlerdiń, «Qaztemirtrans» fılıaly basshylyǵynyń ótinimdi qaraýy, «Qazaqstan Temir joly» AQ «Júk tasymaly» fılıalyna ótinimdi joldaýy sııaqty mańyzdy kezeńder avtomattandyrylmaı otyr. Taýar kassasy kásipkerdiń ótinimin alǵannan keıin «Qaztemirtrans» dıspetcherine ótinimniń bar ekeni týraly elektrondyq poshta arqyly habarlaıdy. Kásipkerler bir ýaqytta ótinish berip, vagondardy ár kezeńde – biri sol kúni, ózgeleri birneshe kún ótkennen keıin alatyn jaǵdaılar kezdesken», - dep málim etti Nurlan Jahın.
Eske sala ketelik, buǵan deıin Atyraýda birneshe ret para alǵan departament basshysy sottalǵanyn habarlaǵan edik.